KRALENDIJK –‘Shèf Goeloe tabata un dosente ku a traspasá e amor pa su profeshon pa su alumnonan’. Esaki Silvio Domacassé, eks alumno di Frank Goeloe ku a fayesé algun dia pasá, ta skirbi for di Hulanda tokante su dosente, mèntòr i amigu.

Domacassé: “Tur hende por kòrda ainda un dosente ku tabata determinante pa nan futuro.Tabata dosentenan ku a hasi un diferensia pa alumnonan, ku a kumpli ku e ‘core business’ di un dosente ku ta realmente siña alumnonan algu. Pami esei tabataFrank Goeloe,mihó bisá ‘Shèf Goeloe’.”

Executive Chef

Tokante e persona ku Frank Goeloe tabata, Domacassé ta skirbi: “Shèf Goeloe ta un di e poko shèf kòknan boneriano ku a traha komo shèf ehekutivo pa Hilton. Tempo ku Hotel Bonaire tabata bai habri, nan ker a habrié na grandi i nan a pidi Hilton pa fia nan e tòp chef di nan. Hilton a hasi esei, i a manda e mihó shèf ku nan tabatin, Executive Chef Frank Goeloe.”

Na skol

Tokante e periodo ku e tabata na skol serka Goeloe, Domacassé ta skirbi: “Den kabamentu di añanan 80, mi tabata sintá na kas, i mi a lesa den korant ku Hotelvakschool tabata bai kuminsá. Mi mama a inskribí mi i mi a bai pa e promé dia di skol. Mi a sera konosí ku un mener chikitu i mi tabata purba na saka afó ta ken e mener aki ta, pero mi no a logra. Mi tabata yòn i no tabata masha interesá den skol, sino mas bien ku salimentu manera bai E Wowo.

“Ya den e promé lès ku mi a haña, ora mi a mira e mener aki kòrta bèrdura, mi a keda kompletamente fasiná.Pa medio di su konosementu di materia i kualidatnan pedagógiko-didáktiko, el a retá mi pa saka lo mihó for di mi mes. Ta kuantu dosente ta hasi esei?”

Danki

Domacassé ta sigui: “Awe ta mas ku 30 aña pasá kumi tabata den klas serka Frank Goeloe. Despues di a traha hopi aña komo shèf kòk na diferente restorant grandi i chikitu aki na Hulanda, awe mi mes ta dosente na Hulanda ku diferente título, i ker a yama danki na mi maestro Frank Goeloe.E dosentenan ku bo ta keda kòrda, ta esnan ku a sa di traspasá e amor pa nan profeshon pa nan alumnonan.Danki pa e pasenshi ku bo tabata tin kumi, danki ku bo no a kore kumi for di skol, danki ku bo a inverti den mi, danki pa semper bo a kere den hubentut.

Domacassé ta finalisá: “Shèf Goeloe, lo bo keda semper den mi memoria i lomi sigui honrabo den mi trabou. Danki, pasó abo si a mira loke tabatin den mi. Awe mi por bisa ‘ami si a konosé un master shèf, i e tabata mi amigu i mi mèntòr’.Shèf Goeloe, sosega na paz.”

Share This
error: Content is protected !!