KRALENDIJK – Despues ku for di den fin di siman tras di lomba rumor a kuminsá sirkulá, ku prizòn di Boneiru(JICN), ta riba ‘lock down’.

Notisia Live 99.9 FM a bai buska informashon pa sa eksaktamente kiko ta pasando. E informashon ku nos ta disponé di dje konfirmá pa e bosero di JICN, ta indiká ku enbèrdat tin alrededor di tres trahadó di e instituto di JICN, ku lo a tèst positivo pa CoViD-19. Naturalmente e tres trahadónan aki, bewakernan di JICN, mesora a ser poné den isolashon na kas. Detenidonan ku e bewakernan tabatin den nan departamentu i tabata den kontakto kuné, a wòrdu isolá den nan sèl. Nan ta den un karentena preventivo, simplemente pa sigui vigilá nan.

Informashon ku Radio Live 99.9 FM ta disponé di dje, ta indiká ku te asta tin un departamentu kompletu den JICN, ku lo ta den karentena kaminda trahadónan tur tambe ta den karentena. E detenidonan ta den karentena den nan sèl i separá. Pues tin 3 empleado di JICN ku a tèst positivo pa CoViD-19, pero no tin niun detenido ku tin e vírùs. E detenidonan ta den karentena, den nan mes sèl, pa nan mes prevenshon, si dado kaso nan desaroyá e CoViD-19, pa nan no pega otro detenido. Esaki ta segun e reglanan stipulá tambe, dor di e departamentu di Salubridat Públiko. Esaki ta sosodé ya ku JICN tin estrecho kontakto ku departamentu di Salubridat Públiko i pa sigui e liña di maneho, ora ku detektá CoViD-19 den prizòn.

Di tur manera Radio Live 99.9 FM ta sigui vigilá e situashon i na e momentu aki JICN tin tur kos bou di kòntròl, naturalmente trahando ku ménos personal, ya ku mester a manda un kantidat di bewaker den karentena na nan kas pa asina kuida pa ku e situashon ku a presentá na e instituto penitensario aki na Boneiru.

Share This
error: Content is protected !!