KRALENDIJK – Informashon ku notisia Live99.9Fm ta disponé di dje ta indiká ku na ofisina di dòkter Esther Bernabela na Antriol tambe tin un empleado ku a tèst positivo pa Covid-19. Esaki ta e di dos ofisina di dòkter di kas ku ta hañ’é konfrontá ku e problema aki i mester bai wak awor ki desishon ta bai tuma pa ku e kaso nobo aki. Manera ta konosí ofisina di Dòkter Lont ta sera awe djaweps i mañan djabièrnè pa motibu ku dos empleado di ofisina di Dr Lont a tèst positivo pa covid-19 i e dos empleadonan aki tabata den kontakto ku diferente pashènt. Pa loke ta dòkter Bernabela su kaso, probablemente e empleado aki no tabata tin kontakto ku hopi pashènt.

Pues e kaso ta poko diferente pero di atenshon. Probablemente por djis laga desinfektá e ofisina di dòkter Bernabela i e trabounan por sigui normal, pero tambe e posibilidat tei ku lo por sera e ofisina di e dòkter pa 1 òf 2 dia pa e situashon ku a presentá. Mañan djabièrnè 5 di mart ta bai tin un rueda di prensa di gobièrnu di Boneiru ku ta relashoná ku e desaroyonan di Covid-19 pa ku e oumento di kasonan nobo i probablemente lo duna informashon tambe tokante e dos ofisinanan di dòkter aki na Boneiru afektá pa motibu di kasonan di Covid-19.

Share This
error: Content is protected !!