KRALENDIJK – Kasonan di Covid-19 ta sigi subi na Boneiru. Departamentu di informashon di Gobièrnu di Boneiru a menshoná ku tin 22 kaso nobo a bini aserka. Total awe djadumingu 7 di mart 2021, tin 92 kaso aktivo i 169 persona den karentena.

Informashon ku Radio Live99.9FM ta disponé di dje ta indiká ku tin un brote di Covid-19 bou di dosente(nan) di skol básiko i sekundario. Entre otro na SGB su unidat di MBO, tin dosente i 2 klas kompletu den karentena pa prevenshon.

Skol amplio Papa Cornes a emití un karta na mayor(nan) ku e skol ta será pa dos dia debí ku un dosente i un miembro di dirèksi a tèst positivo pa Covid-19. Tin diferente dosente di e skol aki den karentena, algun ku sintoma ku posiblidat ku mas ta bai den karentena den e próksimo dianan. Pa motibu ku no tin sufisiente trahadó, direktiva di skolnan katóliko ta anunsiá na mayor(nan) ku SAPC ta será djaluna 8 di mart i djamars di mart 2021.

Kolegio Kristu Bon Wardadó ta otro skol básiko ku a konfirmá ku aki tambe tin un dosente i 2 alumno ku a tèst positivo pa Covid-19 den transkurso di siman. Tin maestra(nan) den karentena wardando resultado i otronan ta monitòr nan salú pa wak si nan ta haña sintoma. E skol ainda ta hasiendo tur loke ta posibel pa keda habrí.

Na Rincon tin dosente(nan) ku a tèst positivo pa Covid-19 na e skol básiko Kolegio San Luis Beltran i diferente ta den karentena. Pa e motibu aki, direktiva di skolnan katóliko ta anunsiá na mayor(nan) ku KSLB tambe ta será djaluna 8 di mart i djamars 9 di mart 2021. Pues no tin skol pa alumnonan di e skolnan menshoná pa motibu di e sirkunstansia ku a presentá. Radio Live99.9 FM ta siguiendo e desaroyo mashá djaserka.

Tuma bon nota di esaki.

Share This
error: Content is protected !!