KRALENDIJK – Lider di frakshon di UPB, Esther Bernabela, a emití un karta relashoná ku dia internashonal di hende muhé. “Awe 8 di mart 2021, dia internashonal di hende muhé tin un tema ku su base lo no kambia i ku ta e lucha di igualdat. Sinembargo pa e aña aki e enfoke ta diferente hasiendo énfasis riba abo hende muhé ku e pregunta; unda i kiko bo retonan ta? Aña 2021 lo keda unu èkstra ordinario kaminda nos hende muhénan, mamanan, abuelanan a biba pasando den un pandemia ku te ainda tin nos den su gara. 

Awe e esensia di e dia aki mester ta e retonan ku nos muhénan Bonerianonan tin. Nos ‘frontliners’ nan femenino hopi bia, mama ,abuela ku famia pa kria pa bosonan: Dòbel aplouso, boso ku ta konfrontando dia pa dia e bataya kontra CoViD-19. E Pandemia ku a pone oumento di karga i responsabilidatnan pa hopi di nos hende muhé i komo konsekuensia di esaki disminushon di independensia, unda situashonnan ta resaltá obligando nos hende muhé pa definí unda nos retonan ta. 

Abo Muhé Boneriano, mama, esposa, abuela edukadó, profeshonal, lider den komunidat, kiko ta bo reto? Ken bo ta reta? 

Tuma e reto di yuda edifiká, empoderá otro muhé. 

Tuma e reto di traha na mehoramentu mediante bon ehèmpel pa yega na strukturanan sosial i di famia ku ta karakterisá su mes di ta harmonioso i ekilibrá. 

Tuma e reto pa invertí den bo hogar i inkluí nos hende hòmbernan, nos esposonan, pareha, tatanan den formashon i edukashon di bo yu(nan) hòmber i muhé, yuda forma ser nan humano firme, rekto, íntegro ku lo apstené di kualkier forma di  diskriminashon no solamente di género, pero tambe di rasa, klase, sosial i religion i ku lo resaltá den duna rèspèt tur forma. 

Tuma e reto pa forma generashon di Bonerianonan ku un fundeshi sólido i ku vishon konkreto di un sosiedat ku lo alkansá nivel de ekselensia  den edukashon i formashon ekspresando komportamentu intachabel.  

E Pandemia a demostrá kon frágil tur loke nos a kere ta fuerte den bida ta. Nos situashon ekonómiko kas i kolapsá, nos pobresa oumentá pero: 

Abo, ami, nos muhénan inkluyendo nos hende hòmbernan lo demostrá ku konfiansa i fe, ku den momentu di krísis nos lo ta firme i sigur bou di inspirashon spiritual di Dios Todopoderoso, nos lo sobrebibí, nos lo tin e resiliensia di kombatí i vense e pandemia aki. Awe 8 di mart un dia pa para ketu i reflekshoná riba nos lidernan di pasado. Laga nos buska forsa den unidat di pensamentu mutuo komunitario. Ban duna forsa i aplouso pa abo hende muhé, abo hende hòmber ku ta luchando dia pa dia den e bataya di e pandemia aki. Tuma e reto, sostené otro i huntu lo nos logra i na momento ku bo tende e humilde i sinsero mensahe aki: Tuma un minüt ketu pa rekordá tur esnan rònt mundu ku e Pandemia aki a bai kuné.  

Awe dia 8 di Mart 2021, mi ta retabo, ban hasi esaki e aña pa kada un di nos duna speransa ku Fe i konvikshon.

Felis dia di hende muhé. Pabien”, na nòmber di lider di Frakshon UPB, Drs Esther Bernabela.

Share This
error: Content is protected !!