KRALENDIJK – Un situashon di abusu kreá pa e sistema di kloaka ku ta situá na Kaya Den Tera den e área pabou di pòmp gasolin ‘Gas èksprès’. Habitantenan ta fadá, desgustá i no sa unda mas pa bai pa kuida nan salú.

For 2015 e problema aki a presentá, kaminda a konstruí un stashon ku ta funshoná ku e sistema di pòmp awa di pos di un sitio pa otro. Habitantenan a konta ku aparte ku a konstruí un área ku pòmp, nos sorpresa, nan a traha baki, esta pos grandi pa fangu e awa shushi, promé e sigui direkshon pa LVV na Lagun ku ta e planta sentral. Tur awa shushi di entre otro bario di Belnem, ta yega na e sitio ‘Den Tera’. For di einan e ta bai direkshon di LVV. E pòmp i e pos ta pèrkurá pa holó hopi desagradabel den henter e área.

Besiñanan a konta kon nan a kambia tur bentana di kas pa algu spesial ku no ta laga holó pasa, sinembargo e no a yuda. Momentu ku áwaseru kai ta un desaster. Na diferente okashon trùk di e kompania ‘MAC Enterprises’ ta bin chupa awa shushu na e pòmp, ta otro molèster teribel di holó stinki. Por komprondé ku awor ta den proseso pa bai limpia e baki na e sitio, ku ta otro desaster ku holó. No ta informá niun besiña i simplemente trahadónan ta risibí nan tarea i ta yega hasi nan kos sin importá e konsekuensia di e holó. A informá Ombudsman di e situashon, sinembargo debí na situashon di CoViD-19 nan no por ta na Boneiru pa kontinuá e proseso di keho.

A papia ku tur instansia sinembargo nada ta sosodé. E problema ta, ku no solamente tin un pòmp, sinembargo tambe un pos i henter e proseso ta kousa hopi molèster di holó ku ta a-higiéniko. E situashon ta peligroso pa salú di hende i niun hende di gobièrnu òf miembronan di Konseho Insular ta tuma e kos na serio, habitantenan a konta Radio Live99.9 FM.

Tanki grandi pa fangu e awa shushi ku a pone awó, promé e sigui direkshon pa LVV na Lagun ku ta e planta sentral
Share This
error: Content is protected !!