KRALENDIJK – E kantidat di persona ku Covid-19 a krese drástikamente e último siman ku a pasa. E situashon aktual ta mas preokupante ku loke tabata e kaso anteriormente. Tin mas ‘cluster’, tin mas kontagio ku no por haña e fuente i ta mustra ku e vírùs ta plamando mas rápido.  E situashon aktual ta pone ku mester tuma medida drástiko pa evitá ku e vírùs di corona ta sigui plama na Boneiru. Esaki ta loke gezaghèber Edison Rijna a bisa durante un enkuentro ku prensa relashoná ku oumentu drástiko di kasonan di CoViD-19.  

“Mi a yega na e desishon pa bai pa nivel di riesgo 5, kiermen ku ta limitá e kontakto ku por tin ku otro persona. Ta pèrmití solamente ku un persona por bin hasi bishita pa kas. horeka ta será, ta pèrmití solamente ‘take out’ te 10’or di anochi. Ningun evento no por sigui. Ta urgi tur hende ku por, pa traha for di kas. Un persona di famia so por bai supermerkado bai kumpra kos. Tiendanan esensial, manera supermerkado i ‘hardware store’, so ta keda habrí. Tiendanan ku no ta esensial, manera pakus di paña, ta keda será. Ta hasi un pedido pa no tene sirbishi òf misa ku personanan presente, por hasi esaki virtual. No ta pèrmití pa personanan ku tin un profeshon ku tin kontakto ku otro hende sigui traha awor akí. Pensa riba pedikür, manikür, un barbero, un hasidó di kabei òf fisioterapista. E riesgo di kontagio ta muchu grandi. Lokual tambe ta será ta kasino, kantor di number i souna.

Pa loke ta trata deporte, ta pèrmití solamente pa praktiká deporte pafó. No por tin kompetensia. Por ‘train’ si pero teniendo distansia for di otro i no den grupo grandi. Pues nada di timnan ku ta train ku otro. Ya ku ta prohibí pa hasi deporte paden, ta bon sí pa den e temporada akí pa sigui move pafó. Esaki ta importante pa bo salú físiko i mental.

Algun siman pasá a kuminsá pèrmití ku pasaheronan di Boneiru por a keda Kòrsou un anochi, sin ku tabatin nodi di hasi e tèst di pcr ora ta bini bèk. Awor ku nos a bai nivel di riesgo 5 ta kita e posibilidat aki for di 8 di mart. Tur hende ku ta bini Boneiru for di Kòrsou mester hasi un PCR tèst.

Pa un lista di e medidanan, un aklarashon riba kua deporte por òf kua no por praktiká i un lista di e tiendanan esensial bishitá www.bonairecrisis.com 

Share This
error: Content is protected !!