KRALENDIJK – Durante e anochi di djabièrnè 12 di mart pa djasabra 13 di mart, Kuerpo Polisial Hulanda Karibense (KPCN) den kolaborashon ku Koninklijke Marechaussee (KMAR) i e direktorado di Supervishon i Mantenshon di Entidat Públiko (T&H), a tene un kòntròl multidisiplinario na vários parti di nos isla.

Tabata alrededor di 10:35 di anochi ku outoridatnan a haña notifikashon di un grupo di persona ku tabata sintá ku djùk rondó di un ‘kampvuur’ patras di algun mata na un bich riba Bulevar E.E.G. ku ta e kaminda ku ta kondusí pa saliña.

Na yegada na e bich, outoridatnan a bin topa ku un grupo di alrededor 9 persona. Na momentu ku e personanan aki a nota presensia di outoridatnan, nan a purba separá for di otro pa despistá outoridatnan ku nan no ta un grupo di persona huntu. Pero nan a lubidá ku ta un djùk tabatin ku kos di bebe pa tur i tur slòf tabata huntu poné rondó di e ‘kampvuur’. Mesora a duna òrdu na e grupo di Hulandes Oropeo pa paga e kandela i piki tur kos pa bandoná e sitio. Tur 9 persona a haña un prosès ferbal komo ku nan no tabata kumpli ku e reglanan di e ordenansa di emergensia i tambe pa sende un ‘kampvuur’ den santu riba e bich, loke ta prohibí pa lei di naturalesa.

Kualkier persona ku ke mèldu un sitio(nan) kaminda tin aglomerashon di hende, por hasi esaki na polis/KPCN via 717-8000 òf e liña di tep anónimo 717-7251. Si ta trata di un negoshi ku a kibra ku regla, durante ora di ofesina mester yama Direktorado Supervishon i Mantenshon di Lei di OLB (Directie Toezicht en Handhaving T&H) via 715-5300 i si ta trata un kaso di emergensia i tambe despues di ora di ofesina por yama 796-4850. Por manda emeil tambe na t&h@bonairegov.com

Share This
error: Content is protected !!