KRALENDIJK – Gezaghèber Edison Rijna a papia siman pasá ku komunidat relashoná ku e situashon alarmante di Coronavírùs (CoViD-19) na Boneiru.

“Mi a kaba di reuní ku e tim di maneho insular, Eilandelijke Beleids Team(EBT), tokante e situashon di COVID-19 na Boneiru. Mi por anunsiá ku despues di a reuní, nos a disidí ku nos no ta bai kambia e medidanan ku tin awor. E tim multidisiplinario di polis, direktorado di Supervishon i Mantenshon i KMar esta Koninklijke Marachaussee lo sigui kontrolá si tur hende ta tene nan mes na e medidanan. Nos a disidí tambe ku mirando e situashon nos ta bai duna mas atenshon na salú mental i komunikashon. E kondishonnan pa biaha bini Boneiru no ta kambia. Kisas e kantidat di kaso lo sigui oumentá. Esaki ta pasobra tin hende a infektá promé ku nos a bini ku e medidanan nobo di fase 5.

Mi a nota ku tin pregunta kon bin ku tantu kaso di COVID-19 awor na Boneiru, tòg nos no ta pasa pa un nivel di riesgo mas haltu ku medida mas drástiko. Tin pregunta tambe kon ta posibel ku aña pasá ora no tabatin niun kaso di COVID-19, Boneiru a bai den lockdown, i awor ku tin un oumento di kaso, nos no ta hasi esei.

Aña pasá Boneiru tabata den lockdown pa tene e vírùs afó. Esei tabata un medida drástiko ku konsekuensia serio pa nos ekonomia. Den e tempu ei mundu henter tabata sa ménos di e vírus di loke nos sa awor. Durante algun luna a logra tene e vírùs di corona pafó di Boneiru.

Ku tempu e vírùs a yega tòg na nos isla. I meskos ku na otro parti di mundu, el a bini pa keda. Nos a siña biba ku e realidat akí. P’esei nos a kuminsá bakuná na Boneiru. Pa si mayan nos pega ku e vírùs, nos no ta bira masha malu ku konsekuensia ku esei ta pone basta preshon riba sektor di kuido.

Medidanan drástiko tin konsekuensia grandi pa nos ekonomia, empleo i forma di biba. Promé ku por tuma nan, departamentu di Salubridat Públiko ta konsiderá diferente kos. Por ehèmpel e kantidat di kaso di infekshon, i e kantidat di grupo di infekshon, esta cluster. Ta wak tambe e kantidat di kaso ku fuente konosí. Si tin un brote grandi na Boneiru ku fuente deskonosí, esei ta un problema serio.

Ta wak tambe si e kantidat di kaso ta pone preshon riba nos sektor di kuido. Bon mirá promé ku disidí pa bini ku medida mas severo, e pregunta ta si nos ta kapas pa kontrolá e situashon. Despues di konsiderá tur kos, departamentu di Salubridat Públiko ta konsehá pa tuma medida mas severo òf nò.

Siman pasá nos a pasa di nivel di riesgo 3 pa nivel 5. Nos ta konvensí ku e medidanan nobo ta sufisiente pa kontrolá e vírùs awor. Tene kuenta sí ku ta dependé di abo, ami i nos tur si nos ta logra. Ta nos tur mester tene nos mes na e reglanan pa nan tin e efekto deseá. Ke men keda kas ora bo no ta sinti bo  kurpa bon i bai tèst. Por yama 0800 0800 pa hasi esei. Ta importante pa sigui mantené 1,5 di distansia i evitá di ta den grupo grandi di hende.

Si mi haña e konseho pa bai un nivel di riesgo mas haltu, mi ta hasi esei. Pero tanten no tin motibu pa esei, i abo i ami tene nos mes na e reglanan, no tin nodi di tuma medida drástiko. Direktorado di Supervishon i Mantenshon, kuerpo polisial KPCN i KMar lo sigui aktua severo si siudadano i empresario no ta tene nan mes na regla.

Laga nos tur sigui kuida nos mes i hende rònt di nos”, gezaghèber Rijna a tèrminá bisando. 

Share This
error: Content is protected !!