KRALENDIJK – Suidadano Gabriël ‘Gaby’ Felix den un karta pa prensa ta papia tokante e palabra responsabilidat, e stürwil i e guía den nos bida.

“Responsabilidat ta algu ku den un komunidat organisá, ordená i eduká, ta deber ku kada un di nos komo suidadano mester tin i mester kargé kompletu pa buena marcha di nos mes i esnan ku ta dependé di nos.

Sin sentido di responsabilidat un komunidat tiki tiki, poko poko i sigur ta bira bruá i ni maske sobrá suidadanonan sí hasi nan esfuerso, lo yega un dia ku tur hende lo sinti e konsekuensianan pisá.

For di chikí, nos mayornan ta siña nos ku un bida sin responsabilidat nó ta ideal i ku esaki lo no funshoná tampoko den bo esfuerso nan pa bo logra loke bo ké den bida.

P’esei nan a siña nos:

• Rèspèt pa otro si bo tambe ké wòrdu respetá.

• Den tempu bon, kòrda warda pa tempu di sekura.

• Sòru di hasi bo bèst na skol, pasó sin preparashon bo chèns di logro den bida lo por keda limitá.

• Kuida bo salú dor di kuida bo manera di kome, bebe, kore outo, etc.

• Rekonosé i duna atenshon na outoridat ku ta manehá pais, regulá i mantené òrdu di bo komunidat. Esei ta na interes di tur hende su bienestar.

Segun Felix, “den tur e punto nan ku m’a trese dilanti, e palabra RESPONSABILIDAT ta presente SIN ku e ta wòrdu menshoná.

Pero ta kuné bo sentido di responsabilidat ta kuminsá evaluá i tuma desishon riba tur loke presentá den bo bida.

Nos komunidat ta pasando den momentunan ku nunka ántes nos a konosé aki na Boneiru.

E Covid-19, huntu ku tur su variantenan nobo, ta birando un menasa hopi serio pa nos. Mira kon na hermana islanan Aruba, Korsou, pero tambe Hulanda, Merka i igualmente sobrá di mundu kuantu tristesa i restrikshónnan e ta trese den bida diario di tur hende. Ta algu ku ta distruí  ekonomíanan, kita posibilidat pa hopi di nos gana un pan.

No opstante ku tin bakuna(nan) ku por yuda salba bida di hende, lo dura ainda un tempu promé ku nos tin né bou di kòntròl. Esei no kiermèn ku nos a eliminé, pasó e no ta bai.

E t’ei pa keda. Simplemente e bakuna ta yuda pa e no por hasí bo daño estravagante.

Si nos ke yega pa nos tin nos isla bèk manera antes, awor ta ora manera ta spera di un bon suidadano di Boneiru, pa nos tende i sigui al pié de la letra lo ke nos Gezaghebèr ta bin ta urgi pa nos tur hasi i logra huntu na bienestar di nos tur.

Nos mester tene nos mes un tempu estriktamente na su òrdu nan pa nos por logra bira e rumbo ku Covid-19 ké duna nos isla.

Sòru pa bo tuma bon nota di e medidanan tumá i sigui nan.

Ami, Gaby Felix, un suidadano konosí di edat, ku a logra hopi ku yudansa di Dios, di mi famia nan i no menos di boso mi ko-siudadanonan, ta supliká boso mi pueblo di Boneiru, pa nos tur ban karga nos RESPONSABILIDAT siguiendo guía di nos suidadano mayó, ku mester guía nos komunidat i isla den e temporada difísil ku tantu é komo nos tur huntu mester enfrentá.

Ban kumpli ku tur e medidanan ku a wòrdu imponé, inkluiendo bakunashon pa pronto Boneiru por ta bèk den “running” manera nos a kustumbrá. Boso tambe hóbennan…. huntu nos por”, Gaby Felix a tèrminá bisando.

Share This
error: Content is protected !!