KRALENDIJK – “Elekshon Tweede Kamer di Hulanda na Bonaire ta un burla di demokrasia, un trampa – no vota o vota blanku.” Esaki ta un karta ku ‘Nos Ke Boneiru Bèk’(NKBB) a publiká ku e meta pa deskonsehá komunidat di Boneiru pa no bai vota elekshon benidero ku ta tuma lugá na Hulanda.  

“NKBB no tin otro alternativa di konsehá e pueblo Boneriano pa no bai vota, pa no kai den e trampa di elekshon pa Tweede Kamer di Hulanda. 

No vota, pasobra nan no ta respetá nos Referèndum i nos demokrasia, tampoko nos derechonan i lei internashonal ku nan mes a firma den tratadonan den Nashonan Uní. Nan lo usa bo voto pa bisa ta bo mes boluntariamente a legalisá e statùs ilegal i bo mes ta bai kontra bo mes voto, ‘Nò’ den referèndum di 2015, ku ta un di e motibunan prinsipal pa ‘Nashonan Uní’ por pone nos bèk riba lista di protekshon di Teritorionan-Sin-Propio-Gobernashon. 

E mesun Knops i otro polítikonan i gobièrnu Hulandes, asistí i yudá pa nan aliadonan lokal ku no ta respetá nos manera di biba, nos kultura, nos norma i balor, nos tradishon, ke destrosá nos identidat, ta trapando nos derechonan, awor tin e kurashi di pidi bo pa vota pa nan. 

  • No vota, pa demostrá ku bo ta kontra ku nos keda ankrá den Konstitushon Hulandes sin derecho igual i ku bo no ke ta un suidadano di segundo rango. Si bo vota bo ta bai di akuerdo i konfirmá ku bo no ke derecho igual. 
  • No vota, pasobra nan lo bisa despues ku ta bo mes a vota i ta akuerdo i yuda hasi legal tur e leinan inhustu ku Tweede Kamer na Den Haag a imponé riba nos i ku no tin problema na Boneiru i tur kos ta bon, ku no tin pobresa i ku tur sobra kos ta nos mes falta, pasobra ta bo mes a vota.     
  • No vota, pasobra abo mes ta bai di akuerdo ku bo lidernan Boneriano ku bo a vota pe i ta den gobièrnu aki i no tin poder ni nada di bisa i ta bo mes ke pa representante di reino i ‘Programma Mananger’ i Knops i Hulandesnan na Den Haag sigui disidí riba nos 
  • No vota, pa mustra ku bo no ta di akuerdo ku tur sèn di belasting ku bo ta paga ta sigui bai Hulanda pa Hulanda sigui usa bo mes sèn pa manda ‘Hulandes-Oropeo’ bin Bonaire bin traha na lugá di nos mes hendenan lokal i biba un bida di rei di nos mes sèn di belasting, kaminda nos Bonerianonan ta den pobresa luchando pa sobrebibí. 
  • No vota, pasobra Knops i gobièrnu Hulandes no ta respetá niun di nos otro islanan ruman, nan a derota e gobièrnu di Sint Eustatius, nan a abusá di pandemia di Covid-19 pa yudansa finansiero pa nan chantagiá i kita, limitá outonomia di Kòrsou, Aruba i Sint Maarten  
  • No vota, pa mustra bo malkontentu ku nan no ta respetá nos idioma papiamentu, ta sigurá nos yunan den edukashon i limitá nan posibilidat pa nan futuro, no ta respetá esfuersonan, sakrifisio i trabou duru di nos penshonadonan i ta introdusí leinan di impuesto i medidanan inhustu kontra nan,  
  • No vota, komo protesta i pa no ta di akuerdo ku e mesun Tweede Kamer ku no ta respetá e pueblo Boneriano ku ta kristian kreyente i ta nan mes a imponé leinan inmoral riba nos. 
  • No vota, pasobra nan no ta respetá e pueblo ku a lucha pa yega na su negoshi, kas i bienes nan i nan a imponé leinan inhustu i impuesto pa kibra e negoshi di e Boneriano i kita su edifisionan, kas, tereno, trabou, bienesnan, mientrastantu nan ta sigui enrikesé nan mes a kosto di nos i nos isla. 
  • No vota, pasobra nan no ta respetá ku e Boneriano tin derecho di eksistensia komo hende i komo pueblo i goberná su mes i ta invadiendo, a yena Boneiru ku Hulandes oropeonan sin limitashon i awor e Boneriano ta un minoria riba su mes isla.  
  • Si bo doño di trabou òf lidernan di partido òf otro nan ta forsa bo pa bai vota bai di menasa e ora vota blanko  
  • No vota, ni duna apoderashon, pasobra si bo duna o bende bo voto, abo lo ta ko-responsabel pa bo nietunan den futuro lo sigui biba sin oportunidat di yega na funshon ni puestonan ni nada riba Bonaire. 
  • No vota pa nan pasobra nan no ta konosí pa nos, no tin konsenshi, ni sintimentu ni kompashon pa nos, nan no ta kumpli ku nan promesanan, no ta kumpli ku nan palabrashonnan, no ta kumpli ku nan akuerdonan etcetera”, NKBB a bisa.            
Share This
error: Content is protected !!