KRALENDIJK – Relashoná ku elekshon di Tweede Kamer na Hulanda gezaghèber Edison Rijna a papia ku prensa mainta i a duna un splikashon kon e votashon ta kanando aki na Boneiru. “Algu mas ku 13 mil hende por hasi uso di nan derecho pa vota na e elekshon menshoná. Un kantidat di 37 partido ta partisipá na e elekshon aya na Hulanda. Na Boneiru tin 4 urna pa por depositá voto repartí den diferente bario riba e isla. A tene kuenta ku tur medida relashoná ku e pandemia di CoViD-19, evitá ku algu por bai robes. Pues entre otro e parti di distansia di 1 meter i mei ta konta tur kaminda i e parti di higiena. Te ku mainta 10or un kantidat di 464 hende ku a bai vota. Esaki ta un kantidat di 3.40% di e total ku por bai vota. Mi ta spera ku durante dia mas hende ta bai vota pa e elekshon importante di awe”, gezaghèber Edison Rijna a bisa.   

Irma de Graaf-Cicilia di Registro Sivil, tambe a papia i a bisa entre otro ku no mester duda den e parti di seguridat di e medidanan. “Tin hopi medida for na entrada pa por drenta kada urna pa por vota. No ta permití nada ku ta kontra e medidanan. Pues tur hende por ta trankil ku e parti seguridat ku ta seif. Un persona den karentena si e no tin un hende di konfiansa, awor ta lat pa e outorisá un otro persona pa vota pe. Si e por yena tur informashon patras di e karchi i laga un hende di konfiansa vota pe”, Irma de Graaf a bisa.       

Share This
error: Content is protected !!