KRALENDIJK – Hues di korte den Promé Instansia di Boneiru, Sint Eustatius i Saba mr. P.E. de Kort, den su veredikto djaweps 18 di mart último, a revoká e suspenshon di pago temporal ku a otorgá na e kompania venesolano i a deklará e kompania Bonaire Petroleum Corporation (BOPEC) den estado di bankrut. BOPEC, ta e kompania di almasenamentu di zeta krudo na Boneiru. Na mes momentu a nombra abogado mr. C.M. van Liere di e ofisina di HBN Law komo curator.

BOPEC no por kumpli i den e kaso, riba 9 di mart 2021, korte a duna BOPEC suspenshon temporal di pago i a nombra mr. Van Liere komo atministradó (bewindvoerder). Promé ku esaki a tuma lugá, korte a risibí un petishon di ontvanger di Belastingdienst Caribisch Nederland pa deklará BOPEC fayit. 17 di mart sinembargo mr. Van Liere a pidi korte pa revoká e suspenshon di pago temporal di BOPEC, un petishon ku onvanger a sostené. Segun e atministradó mantenshon di e suspenshon di pago, mirando e estado di e pertinensianan di e kompania, no tabata deseabel i no tin solushon na bista pa pago na e akreedornan. Ademas ta resultá segun e atministradó, ku no tin sufisiente likides pa Boneiru por kumpli ku su obligashonnan koriente. P’esei e ta hañ’é obligá ta pidi revokashon di e suspenshon di pago i pidi pa deklará BOPEC fayit.  

BOPEC di su banda a resistí kontra revokashon i a argumentá ku den algun dia un otro persona lo por a depositá e montante di 2.5 mion dòler riba un kuenta na Boneiru. Kompletamente na disposishon di e kompania.  

Deklará Fayit     

Korte ta konkluí ku desde nan a duna e suspenshon di pago, e situashon di BOPEC no a mehorá. No a kumpli ku e obligashonnan koriente, loke ta pone ku e peso di e debe a sigui oumentá. Esaki ya ta motibu pa no sigui mantené e suspenshon i sigur, no awor ku e atministradó ta enfatisá, ku no tin bista konkreto ku lo bai tin mehorashon i ku riba tèrmino lo bini likides na disposishon. BOPEC ademas no a duna niun partikularidat di unda e montante menshoná lo a bin. No tin ningun dokumentashon riba papel al respekto. Na opinion di korte no tin nada konkreto i no por verifiká esaki, sigur mirando ku ya for di yanüari 2021, e kompania no ta pagando su trahadónan. Ya pa hopi luna por papia di un situashon urgente i hopi problemátiko na e kompania. Korte no por a yega na niun otro konklushon ku mester revoká e suspenshon di pago temporal i deklará BOPEC fayit.                 

Share This
error: Content is protected !!