KRALENDIJK – Direktiva i shopsteward nan di AFBW ta informá miembro i kompañeronan, ku nan ta sinti falta di organisá reunion general. Esaki ta loke nan a skirbi den un karta.  

“Nos tin deseo pa organisá un reunion general di AFBW pa informá na un i tur, loke nos ta hasiendo i tambe pa por kontesta kualke pregunta ku un miembro por ta sintá kuné e momentu aki. Sinembargo, manera tur hende sa, esaki no ta posibel debí na e situashon aktual ku Boneiru ta pasando aden. Pa e motibu aki, AFBW a duna diferente informashon pa medio di prensa, medio sosial i sistema di video, pa un i tur por ta na altura di loke nos ta hasiendo. Den e boletin, AFBW ta bai duna bo mas informashon, pa bo ta mihó informá.

Na komienso di 2021, AFBW a haña un organisashon mas ku ta BonLab, pa representá e mayoria di su trahadónan, AFBW ta yama bon bini na miembronan nobo ku ta empleá na BonLab. Nos ta informá ku dos negoshi mas tambe a forma parti di e kampaña nan ku ta duna deskuento na miembronan di AFBW, e dos kompanianan aki ta: Subway i Loya Brasil B.V.. Durante 2021, AFBW mester negoshá kuater CAO di e siguiente organisashon: nan ta BonLab, Fundashon Mariadal, FCB/FKB i BWM.

Nos kas sindikal a haña un ‘facelift’ parti paden. Awor nos kas sindikal tin tur fasilidat di kantor i sala di reunion i lokalidat pa duna lès. Tambe nos a inisiá ku un proyekto di potrèt den nos kas sindikal ku ta ilustrá e historia di AFBW i tambe e presente, di e forma aki honra nos baluartenan i duna realse na nos sindikato. Un otro detaye; dos sindikato a uni nan mes ku e meta di AFBW i tin nan kantor den nos edifisio. AFBW ta deseá pa informá ku tabatin diferente reunion ku a tuma lugá, sea ta miembronan di direktiva so a reuní òf tambe direktiva ku e shopsteward nan. AFBW a reuní na vários okashon ku doñonan di trabou pa atendé asuntunan laboral. Den reunion di USIBO tambe AFBW tin partisipashon i komo sindikato nos a sinta den reunionnan tripartit ku diputadonan pa interkambiá di idea, duna rekomendashonnan i trese nos preokupashon pa dilanti. 

AFBW komo sindikato responsabel a duna asistensia na diferente miembro i a trata diferente kaso di esakinan. Tambe karta di miembro òf personanan ku nan derecho a keda trapa, a entrega nan serka nos sindikato i a tuma esaki na serio i trata nan tambe komo tal. AFBW komo sindikato responsabel i transparente ta kumpliendo kabalmente ku su deber nan finansiero. Pa fin luna di mart 2021, nos akountent ta kla ku e relato finansiero 2020 di AFBW. Nos a start ku un kurso interesante ku yama ‘Gobernashon’. Meta di esaki ta pa nos miembronan ta mas mihó informá kon henter e aparato gubernamental ta hinka den otro i su funshonamentu i den kua lei esakinan ta regla. AFBW ta bai sigui sigur ku mas kursonan i e siguiente planiá ta di shopsteward i direktiva. AFBW tin plan grandi manera boso ta mira pa su miembronan. Ta bai sigui monitòr e situashon rondó di CoViD-19 hopi di aserka i mira kua posibilidat por krea pa tòg organisá un reunion general”, direktiva i shopsteward nan di AFBW a bisa. 

Share This
error: Content is protected !!