KRALENDIJK – Willem Cecilia ta remarká relashoná ku e enkuesta resien hasi. “Mi a tuma nota ku e matutino Extra-Boneriano a pidi RCN un reakshon riba mi análisis pa loke ta trata nan último enkuesta tokante media ku den mi opinion no ta representativo. Mi ta kontentu ku e matutino a hasi esaki, pasobra mi persona sigur no ta ‘Don sabe lo todo’ i sèmper ta bon pa wak e otro banda di e medaya tambe.  

E kontesta ku RCN a duna i si e matutino a interpretá esaki bon, sinembargo i frankamente ta desepshonante. E konfiabilidat ku ta papia di dje simplemente ta e totalidat mínimo di bo muestra ku bo mester pa por bisa si bo investigashon pa 90%, 95% i 99% ta konfiabel. Den e kaso aki a skohe pa 95% di konfiabilidat. Ku un asina yamá ‘steekproef-calculator’ simplemente bo ta determiná e total mínimo di bo muestra. Un konfiabilidat di 95% nifiká ku den 5% di e situashon, loke a midi no ta kuadra sufisientemente ku e realidat. Nada mas. E no ta bisa nada di e faktor representativo.  

Hecho ta ku e respondentenan di un enkuesta mester reflehá e populashon di Boneiru si bo kier bisa algu di e pueblo boneriano. Esaki ta e faktor di representashon. RCN ta bisa ku a tene kuenta ku klasifikashon di edat, lugá di nasementu, idioma materno i idioma ku e partisipantenan ke risibí informashon. E último aki sigur ta tramposo. Den un enkuesta sèmper mester tin e parti demográfiko. Si wak pregunta dos di e enkuesta anto solamente ta pidi den ki kategoria di edat bo ta kai. Nada mas. No ta puntra pa sekso, no ta puntra pa lugá di nasementu i no ta puntra den ki bario bo ta biba. Alomenos mi no ta wak esaki den e rapòrt. E informashon demográfiko simplemente ta preguntanan ku ta yuda pa duna un bista kla di e identidat di bo respondentenan (mira fig 1). Tambe e ta yuda pa komprondé den ki segmentu di e poblashon e respondente ta partenesé. Awor hasta e porsentahe di kuantu hende muhé i kuantu hende hòmber ta ousente.  

E informashon na unda tur hende ta biba tambe ta un faktor di sumo importansia pa asina bo por generalisá resultadonan di un enkuesta. Informashon di 2017 ta mustra ku 65% di Bonerianonan ta biba na Rincon, 51% den Mexico i 48% den Nort Saliña. Den Lagun Hill, Lima i Sabadeco sinembargo masha tiki Boneriano ta biba. Di otro banda e hulandesnan oropeo ta biba plamá riba e isla pero e konsentrashon ta grandi den Lagun Hill kaminda nan ta forma 60 di e populashon. Na Lima esaki ta 54%, Sabadeco 53% i Santa Barabara 52% (mira fig 2). I ainda nos no a papia di e otro nashonalidatnan.  

Un periodista a supliká mi persona pa no hasi mi komunikadonan muchu largu. Pues mi ta terminá tresiendo dilanti ku di e 48 preguntanan hasí den e enkuesta, reakshon riba 15 di nan a keda afó. No ta duna splikashon. Komo profeshonal i no komo komentarista, mi no por konkluí otro atrobe ku e enkuesta no ta representativo pues no por generalisá esaki. Lo ripití atrobe loke mi a trese dilanti biaha pasá: Si tòg basa maneho riba investigashonnan ku no ta representativo, anto ta violá un di e prinsipionan di bon gobernashon, den esaki e prinsipio ku mester ta kuidadoso”, Willem Cecilia a bisa. 

Share This
error: Content is protected !!