KRALENDIJK – Désirée ‘Daisy’ Coffie di Frakshon Coffie, a manda un karta pa gezaghèber Edison Rijna relashoná ku asuntunan rondo di CoViD-19. “Mi a keda ketu algun dia, Sinembargo mirando kon e asuntunan relashoná ku e pandemia di Covid-19 i su variantenan ta desaroyando riba nos isla, i mirando ku nos komunidat ta preokupá ku e desaroyonan aki, mi ta sinti mi yamá komo representante di nos komunidat, pa aserká Gezaghèber ku mi prekupashonnan. 

Na promé lugá mi ta aploudí ku porfin djaweps último, Gezaghèber a tuma desishonnan mas severo, pa loke ta trata e medidanan ku a tuma pa kontrarestá e plamamentu drástiko i alarmante di e vírus Covid-19 i su variantenan, konsiderando e sifranan haltu ku Boneiru te ku awe ta eksperensiando. 

Mi a tuma nota ku den e ordenansa di emergensia den konsepto, fechá 18-03-2021, a tene kuenta ku diferente aspekto pa tòg laga nos komunidat ku un tiki espasio pa por biba nos bida sosial-ekonómiko di tur dia denter di e normal nobo ku nos ta bibando ak­tual­mente.  

Sinembargo Gezaghèber, ainda mi ta keda ku algun preokupashon, algun di nan ya mi a trese dilanti kaba den reunionnan anterior di Konseho Insular, Komishon Covid-19 i/òf Presidio. 

Pa loke ta trata enseñansa; te na e momentunan aki Gezaghèber, Konseho Insular no a risibí e protokòlnan primintí dor di Gezaghèber dia 12 di òktober último. Mi a tuma nota si, ku entre tantu e aspekto di kontagio bou di muchanan te ku 17 aña a tuma un rumbo alarmante. Esaki ta alarmante pasobra nos tur sa ku muchanan te ku 17 aña por ta infektá sin tin ningun síntoma; pues via di nan otronan por kontagiá fásil, tantu na kas komo na skol, sin sa mes. Pa koroná e obra, vários dosente di skol sekundario ta tèst positivo pa Covid-19 poniendo asina klasnan kompleto i koleganan na riesgo di infekshon. Mi a supliká for di òktober 2020 pa tene kuenta ku nos skolnan ku no tabatin mag di sera, kontrario na Hulanda nos tera mama, kaminda a sera tur skolnan pa evitá posibel kontagio pa medio di alumno i studiantenan. Lástima ku; e baka mester a kai den pos, pa tuma e desishon pa sera skolnan pa enseñansa físiko, manteniendo kaminda ku por duna enseñansa riba distansia ‘online’. A laga espasio pa studiantenan por bai hasi nan eksámennan na skol mes si i ora esaki ta nesesario. No opstante e desishon di Gezaghèber menshoná den artíkulo 1.18; enbes di saka e baka fo’i pos, nos mes ta purbando na hoga e baka den pos: tin dosentenan ta yama e studiantenan di klas di èksamen pa bai tuma lès físiko na skol! Tin ku tene kuenta ku e studiantenan tambe entretantu tin miedu di keda kontagiá i esaki ta afektá nan prestashon. Esaki na mi konsepto no por Gezaghèber; ta faltando ku e artíkulo 1.18 di e ordenansa di emergensia fechá 18-03-2021. 

Mi a tuma nota ku e ‘Lei Seku’ ku ta vigente; no ta kompletamente seku; alkohòl ta disponibel den tur supermerkado i tur hende por kumpra. Na mi konsepto un lei manera esaki, mester ta kompletamente vigente i no mitar mitar, sino ta kon i kiko ta kontrolá? 

Pa loke ta trata restorantnan: esnan di hotèl mester duna ‘room service te na porta di kamber’ òf ‘takeaway’, meskos ku e restorantnan pafó ta ofresé nos lokalnan ‘takeaway’. No lubidá ku ta nos lokalnan ta traha den e restorantnan i barnan den e hotèlnan i pues nan ta keda eksponé na posibel kontagio di e forma ku restorant i bar ta drai awor den hotèlnan. 

Mi pregunta na Gezaghèber ta; ken ta disidí kua negoshi tin un funshon vital i a base di kua kriterionan ta disidí esei? Ami a mira sierto tiendanan habrí ku mi no por komprondé nan grado di funshon vital pa nos komunidat. Si e lugá ta habri sin tin funshon vital, ta nifiká ku ta pone e personal ku tin ku traha mas na riesgo di kontagio. 

Hasi deporte individual tur dia den aire liber! Esaki ta loke Gezaghèber a konsehá nos deportistanan siman pasá djaweps. Wèl Gezaghèber; tur hende a tuma e konseho na serio; di tal forma ku awendia kayanan ta yen yen di hopi hende ku ta kana, djòg, sprent individual òf den grupo ‘chikitu’, sinembargo na hopi den aire liber. Topamentu di otro, kumindamentu, papiamentu un ratu, sin tapaboka, pasobra no por hasi deporte ku tapaboka Gezaghèber. Mi ta preokupá pe hasimentu di deporte individual den aire liber di e forma ku e ta tuma lugá. 

Pa loke ta trata krèsh i akohida pa mucha, si nos mira kuantu mayor tin funshon vital i mester di akohida pa nan yunan, ta parse manera no tin ‘lockdown’ òf ku ta mas ku mitar di Boneiru tin un funshon vital. 

Tambe nos a tuma nota ku apesar di e asina yama ‘lockdown’ tin masha hopi vehíkulo ku kantidat di okupante ta trafiká riba kaya tur ora di dia eksepto den oranan di ‘toque de queda’. Mi ta sugirí pa evaluá e interpretashon di ‘Nivel 6: Lockdown’. 

Gezaghèber, bichnan ta yen yen di hende bailando, gosando, bebiendo nan alkohòl riba un rùst. E bichnan skondí ku ta keda mas i mas bishitá. Mi a nota ku polis, T&H i KMar ta hasiendo nan parti pa kontrolá i solushoná e situashon. Sinembargo  no ta fásil Gezaghèber. Na mi konsepto mester prohibí baimentu di bich.  

Kon ta pará ku tur e avionnan ku ta yegando Boneiru ku turista i tambe nos mes lokalnan ku ta bai keiru pafó di Boneiru i regresa? No ta tempu pa stòp tur vuelo sikiera pa 2 siman? 

Mirando e kantidat di hendenan hòspitalisá i e nesesi­dat di kuido intensivo pa motibu di COVID-19, por fabor konsiderá pa pidi Ministerio di VWS pa regla pa Hulanda por manda e barku Karel Doorman aki, ya asina nos ta haña ayudo ku e parti di kòntròl i mesora nos ta haña mas ayudo médiko i di kuido i ICU disponibel na Boneiru mes ya ku e barku menshoná ta bon ekipá pa loke ta trata esakinan. 

Nos a tuma nota ku ta reklutando personal di kuido na Hulanda i ta ofresé vários benefisio adishonal na e solisitantenan. Nos ke djis rekordá pa no lubidá riba nos personal di kuido lokal ku ta hasiendo un trabou ekstraordinario den e pandemia aktual. Nan tambe meresé insentivonan. 

Gezaghèber, mi ta kontentu ku a kuminsá duna mas hendenan den funshonnan vital preferensia pa bakuná. Mi ta spera ku Hulanda por manda tur e kantidat di bakuna nesesario pa bakuná henter Boneiru den un solo bia, ya por habri e vakunamentu mesora pa tur hende ku ta deseá di vakuná. 

Konsiderando e grado grave ku nos a alkansá ku e kasonan di Covid-19 aki na Boneiru; nos ta e munisipio di Hulanda ku mas kaso ‘per capita’ den Reino, mi ta kere ku mester kuminsá pensa riba dos siman medidanan severo, esta ‘lockdown’ di bèrdat, kisas ‘shelter in place’, ‘toque de queda’ i lei seku; ku e úniko intenshon pa nos baha e kasonan bek te bou di 10 i preferiblemente te sero. 

Por último, mirando tur loke mi a deskribí, mi ta kere tambe ku a yega e momento pa konsiderá serio pa atraé un epidemiólogo konstante na Boneiru. Mi tin impreshon, ku rèspèt pa tur hende ku e pandemia aki a surpasá nos kapasidat humano eksistente”, Désirée Coffie, di Frakshon Coffie a bisa den su karta na promé mandatario di nos isla.

Share This
error: Content is protected !!