KRALENDIJK – James Finies di ‘Nos Ke Boneiru Bèk’, ta menshoná den un komunikado pa prensa relashoná ku elekshon di Tweede Kamer; ku e resultado ta duna un mensahe kla.  

“Ku e resultado di elekshon di Tweede Kamer 17 mart 2021, ta papia palabra kla; pueblo di Boneiru no ta kontentu. Esaki ta un ’rechaso di gobernashon Hulandes’ indiskutibel. E resultado di djarason ultimo, ta mustra un mensahe kla, pasobra for di 13.490 hendenan ku tabatin derecho di vota, solamente 3.076 a bai urna representando 22%. 10.414 votadó malkontentu no a bai vota. E último elekshon di Tweede Kamer di 2017 tabata meskos ku 77% no a vota i meskos  tabata na 2012, e resultado tabata similar 76% no a vota. ‘Nos Ke Boneiru Bèk’ su kampaña; No bai vota, manera semper tabata determinante den e viktoria kaminda un biaha mas ku e pueblo a uni aunke ku nan ta di diferente partidonan polítiko, nan a uni i demonstrá nan malkontentu i rechasá di tuma parti den e forsa di demokrasia aki. 

E elekshon ku a keda imponé riba e pueblo di Boneiru, ta un burla o forsa di demokrasia pa nos pueblo, pasobra ta mes un parlamentu Hulandes, Tweede Kamer a ankra nos den nan konstitushon sin derecho igual ta konsistí di 150 asiento situá na Den Haag, kaminda nan tur a bai di akuerdo ku e akto kriminal kontra nos pueblo.  Pa un asiento mester di mas o ménos 60 mil voto i na Bonaire tin 13 mil hende ku derecho di vota i nos no tin niun chèns matemátiko. Mas imposibel ta pa kambia Konstitushon Hulandes bèk na nos fabor pa duna nos derecho igual, nos mester dos tersera parti(2/3) di e parlamentu Hulandes, ku ta 100 asiento pa bai di akuerdo pa kambia esaki bèk. No solamente den un periodo di gobernashon, sinembargo den dos diferente elekshon i  periodo di gobernashon, e 100 miembronan di parlamentu o Tweede Kamer Hulandes, mester bai di akuerdo ku esaki. 

E partidonan polítiko MPB, UPB i DP nan lidernan prominente, lidernan di sindikato di Bonaire i otronan, tur agresivamente a promové na gran eskala via televishon, radio i aviso den korant. Un kampaña di elekshon hopi elaborá i kostoso, nunka bisto na Boneiru na fabor di partidonan polítiko hulandes ku nan tin aliansa kuné na Hulanda. Nan tur a kere ku e biaha aki lo tabata diferente, sinembargo nan tur a keda ku bèrgwensa pa motibu di partisipashon hopi abou. E resultado ta un rekordatorio fuerte ku e pueblo no a skohe pa integrashon i ku nan a keda fòrsá den un aneksashon ilegal. 

E parlamentu Hulandes, Tweede Kamer, a aneksá e islanan BES, inkluyendo Bonaire riba 10 òktober 2010 I a eliminá e derechonan demokrátiko di e pueblo Boneriano. Desde 10.10.10 e parlamentu o konseho insular di Bonaire, skohe demokrátikamente pa pueblo Boneriano a keda supordiná, bou di gobernashon i lei hulandes i a start ku un tipo di gobernashon kolonial institushonalisá di siglo 21 riba nos pueblo.  Na òktober 2017 e parlamentu i gobièrnu Hulandes unilateralmente pa medio di un lei no demokrátiko, a kompletá e aneksashon ilegal dor di integrá e pueblo Boneriano sin derecho igual den konstitushon Hulandes degradando nan na nivel di suidadanonan di segundo klase den un forma nobo di apartheid den Reino Hulandes i mundu. E pueblo Boneriano desde e tempu aya, ta keda goberná den un status ku e no a skohe, sin derecho igual, un status ku un  rechaso abrumador, un voto no desisivo di e pueblo den referèndem di 2015.   

Nos fundashon Nos Ke Boneiru Bek su kampañanan konsistente di konsientisashon a duna resultado i a para firme, pasobra e pueblo no a bai tras di e kampaña manipulativo den media di nan lidernan, ku por keda konsiderá traidor di nan mes pueblo. E pueblo Boneriano a para firme i a reskatá su dignidat, pasobra mas ku 77% di e elektorado a protesta pa medio di e akshon di no vota kontra di e invashon i okupashon hulandes di Boneiru. ‘Nos Ke Boneiru Bèk’ ta kontinuá traha diligentemente riba nos trayektoria pa pone Bonaire bèk riba lista di teritorionan -sin-propio-gobernashon – di Nashonnan Uni”, James Finies di Nos Ke Boneiru Bèk a bisa. 

Share This
error: Content is protected !!