KRALENDIJK – Gezaghèber Edison Rijna a papia na Radio Live 99.9 FM i el a splika entre otro tokante e programa di bakunashon na Boneiru. “Nos ta den palabrashon pa habri e posiblidat pa bakuná tur hende, pues no solamente esnan riba 60 aña manera ta e kaso awor. Pronto e plan ta pa intensivá e proseso pa bakuná por lo ménos 500 persona pa dia. Ta bai sali un komunikado pa informá di esaki; awe òf mañan. E kombersashon ku Hulanda ya ta tumando lugá pa por aselerá e proseso. Wikènt tras di lomba a papia ku Hulanda i ta di akuerdo pa duna e kantidat di bakuna pa por aselerá proseso. E plan ta pa promé ku fin di luna, intensiva e programa di bakunashon. Si tur kos kana bon pa luna di yüni gran parti di komunidat ta bakuna. For di awor mi ke hasi un yamada na kada suidadano ku ta riba 18 aña pa registrá www.bonairecrisis.com, pa bakuna mas rápido posibel, asina tur kos ta kla, denter di algun dia. Ta bai tin mas sitio pa bakuná momentu ku e proseso amplia pa bakuná hende. Si hopi hende bakuná, esei ta yuda pa kibra e brote grandi ku tin di hopi hende infektá ku e vírùs i ta bira malu. Ban mantené nos mes na e medida i reglanan asina por yega na un situashon ku nos tur ta deseá pa yega, un bida trankil i relahá i liber. Pa awor mester tuma e medidanan pa purba dominá e situashon. Tin preshon haltu riba kuido na hospital i ta nos tin ku yuda pa trankilisá e situashon. Mas nos hasié, mas rápido nos ta bai bèk na e situashon, kaminda hende tin mas libertat. Mas informashon lo sigui pa medio dimi i otronan konserní pa tur hende ta bon informá”, gezaghèber Rijna a bisa.

Share This
error: Content is protected !!