KRALENDIJK – Gezaghèber Edison Rijna a papia na Radio Live 99.9 FM i el a splika entre otro tokante medidanan ku ta na vigor relashoná ku e situashon di Covid-19 na Boneiru. “For di siman pasá djaweps nos a inisiá ku e medidanan nobo, kaminda entre otro anochi tin e ‘Toke di Keda’ entre 9’or di anochi pa 4’or di mardugá. Polis i Koninklijke Mareshausee ta trahando den bon kolaborashon pa ku esaki. Directie Toezicht en Handhaving di OLB tin horeka i hotèl na nan enkargo. Riba e promé dia di e ‘Toke di Keda’ anochi, aki aya a tuma lugá algun situashon ku mester a atendé ku sierto hendenan. Wikènt a bai poko mas trankil, sinembargo na komienso di e siman aki tabatin algun insidente ku a sosodé, entre otro tiramentu di vürwèrk, opstákulo riba kaminda i mas. Ta di lamentá pasobra e kosnan menshoná no ta kos ku mester a sosodé. Ta bon pa mantené na e reglanan asina nada ta bai robes.

Mi ta kontentu ku e trabou ku esnan konserní ta hasi ku ta kana den bon direkshon. E idea ta pa mi mes sali riba kaya ku nan, asina eksperensiá kon e trabou ta tumando lugá. E medidanan aktual ta sigui i ta dependé kon kos keda. Momentu ku tuma desishon riba konseho di EBT pa medida nobo, ta huntu ta hasi esaki i mester tuma tempu pa wak kon tur kos ta desaroyá i funshoná. Ta tuma mas o ménos 10 pa 14 dia pa por mira resultado di e medida. Si ripara ku e situashon no ta bai den bon direkshon, tin ku ahustá e medidanan. Kisas ‘Toke di Keda’ henter dia. Pa awor mi no ta mira e nesesidat pa mas medida. Esei no ta nifiká ku nos ta kana atrasá. Tur desishon ta wòrdu tumá na e momentu apropiá. Ta bon pa duna e medidanan tempu pa mustra ku nan ta funshoná i no tuma desishon deskabeyá i no balansá ku por krea mas problema pa henter e komunidat. Pues e posiblidat tei ku por tuma medidanan mas stringente. Mi ta spera tur hende kuida pa asina pronto nos por baha e medidanan i no oumentá nada.

Tokante butnan ku a duna relashoná ku ‘Toke di Keda’ mas tantu ta esnan ku no tin mag di bai riba kaya entre 9’or di anochi pa 4’or di mardugá, tambe esnan ku ta konsumí alkohòl den área públiko, negoshinan ku ta keda habri despues di orario i bende alkohòl ku no ta pèrmití e momentu. Tin bon kòntròl den dia i anochi riba establesimentunan di horeka, kompanianan vital i no vital kon nan ta funshoná i kumpli ku e reglanan. Tokante informashon di duda ku tin tokante sierto informashon manera entre otro negoshi vital vital òf no, por yama 715-5300 i komuniká ku Toezicht en Handhaving. E situashon ta poko fastioso, sinembargo por tuma nota tambe riba website di gobièrnu www.bonairecrisis.com, kaminda tin tur informashon”, gezaghèber Rijna a bisa.

Share This
error: Content is protected !!