KRALENDIJK – Konsehal independiente Daisy Coffie di frakshon Coffie, a manda un karta pa gezaghèber Edison Rijna tokante un petishon pa un fiansa di 250 mil dòler pa BOPEC i ta pendiente pa un reakshon rápido. 

“Djaluna siman pasá Gezaghèber Edison Rijna, a informá nos den un presidio, ku a drenta un petishon pa un fiansa di 250 mil dòler for di e ‘bewindvoerder’ den e kaso di ‘surséanse van betaling’ ku korte a duna BOPEC.”    

Gezaghèber Rijna a keda di duna nos informashon adishonal durante e siman. Entre tantu nos a tuma nota ku korte a deklará BOPEC fayit. Kiko esaki ta enserá den e totalidat aki? 

Biniendo bèk riba e petishon pa fiansa di 250 mil dòler. Na tur okashon OLB a mantené e posishon di lo no mete den BOPEC, argumentando ku gobièrnu no por mete den un kompania privá. No mester lubidá ku biaha pasá kaba a duna BOPEC un adelanto di un montante semehante sin ku a buska aprobashon di Konseho Insular i sin ku a pone e adelanto aki riba papel ku e kondishonnan bou di kua a duna e adelanto. 

Komo miembro di Konseho Insular mi ta atvertí Kolegio Ehekutivo pa no kometé e mesun eror aki. Ta p’esei mi petishon ta pa Kolegio Ehekutivo manda tur dokumentashon detayá ku ta sostené e petishon di e ‘bewindvoerder/curator’ pa Konseho Insular mas pronto posibel. 

Mi ta deseá di mira tur e konsehonan di e departamentunan, spesialmente esun di finansa na Kolegio Ehekutivo. 

Interesante ta; pa sa kon ministerionan di Hulanda, en partikular RWS i ILT ta pensa, sinembargo mas importante ta kon gobièrnu hulandes ta pensa riba e situashon. Al fin al kabo, nan ta ko-responsabel pa e debakel ku BOPEC a pasa aden. Ku e karta aki mi ta spera un reakshon rápido di gezaghèber Rijna”, Konsehal Daisy Coffie a bisa. 

Share This
error: Content is protected !!