KRALENDIJK – Tur e trahadónan di BOPEC lo risibí un karta di retiro di e kuratòr ku un ‘opzegtermijn’ di seis siman.

Esaki USIBO ta trese dilanti den un komunikado pa prensa despues ku korte a deklará BOPEC Fayit djaweps siman pasá.

“Ya USIBO a antisipá riba esaki i den un reunion virtual ku SZW huntu ku FEDEBON i BPWU, a yega na un areglo ku kada trahadó no mester bai SZW bai yena formulario etcetera. Pa medio di e atministrashon di pago di salario di BOPEC, ta kalkulá kuantu kada trahadó tin derecho riba dje i segun ta palabrá te awor, pa djabièrnè 26 di mart binidero, e trahadónan ta risibí nan sesantia. A palabrá ku e montante ta nèto, di moda ku e trahadó no tin ningun molèster pa loke ta asuntu di belasting. E salario di yanüari, febrüari 2021 i e bashí premie lo bai den e lista di esnan ku BOPEC debe i pago di e suma ta bai dura, esta si  tin sèn pa paga. Banda di esei, USIBO ta sigui kere ku gobièrnu di Boneiru, banda di e ayudo sosial ku nan a duna kaba, nan mester hasi tur esfuerso pa kumpli ku e desishon di Konseho Insular i konvensé Ulanda pa paga tur e trahadónan di BOPEC durante un temporada determiná sigur 80% di nan último salario. E motibu pa esaki ta ku Ulanda no por bira lomba pa e trahadónan i nan famia, sigur nò pa e motibu ku Ulanda a sostené e sanshonnan ku Merka, a imponé riba Venezuela i esaki a opstakulisá en grandi ku BOPEC por a sigui ku su operashon normal i kumpli ku su obligashonnan finansiero, entre kua salario i otro kondishonnan laboral. Pues Ulanda tin un obligashon moral sigur pa duna un man. USIBO ta spera ku miembronan di Konseho Insular, ku unánimamente a para tras di e desishon, lo no bai drumi, sinembargo ta pone e preshon positivo nesesario pa Kolegio ehekutivo, esta gezaghèber i e diputadonan kumpli.

Share This
error: Content is protected !!