KRALENDIJK – Tantu korte komo e kuratòr no a keda konvensí pa gerensia di BOPEC, ku BOPEC lo por a disponé di fondonan pa sigui ku operashon di e terminal i kumpli ku tur obligashon finansiero, entre otro, pago regular i na tempu salario di e trahadónan i tambe kumpli ku e otro obligashonnan laboral, manera bashí premie i mas.  

Esaki ta un komunikado ku USIBO a manda pa prensa despues ku korte a deklará BOPEC Fayit djaweps siman pasá.  

“E mesun tenementu na liña di e trahadónan pa sigur un aña largu, gerensia di BOPEC a usa ku korte. Sinembargo ya despues di ménos ku un siman, e kuratòr a mira e wega i a aserká korte pa deklará BOPEC fayit, loke korte a honra. Ku esei a yega un fin tristu na e operashon di e terminal di BOPEC N.V., un yu di PDVSA. Awor a keda pa e kuratòr atendé ku tur e kreditornan, esta tur esnan ku BOPEC debe, wak kuantu hende of instansia debe BOPEC i  traha e balansa di e terminal. Ku esei lo bira posibel pa hasi un ‘doorstart’, esta kontinuá ku e kompania. USIBO su pensamentu, kontinuashon bou di PDVSA òf un kompania ligá ku PDVSA ta parse nos masha difísil, sinembargo no ta imposibel. A keda e ora ei ku e kurator por buska un operador pa kontinuá ku e kompania òf un kumpradó pa kontinuá ku e kompania. Esaki por sosodé ‘onderhands’, pues ta publiká i interesadonan por inskribí. E otro posibilidat ta pa bai findishi, esei lo nifiká benta públiko, USIBO lo vigilá kua di e opshonnan ta bai skohe. Den kualke opshon, USIBO ta yuda e sindikatonan pa buska e mihó interes di e trahadónan ku a pèrdè nan trabou. Un final tristu di un empresa ku 45 aña a kontribuí na ekonomia di nos isla, a krea trabou pa hopi hende, pa motibu di un banda mal maneho (falta di mantenshon) i na e otro un banda guera polítiko riba nivel mundial, a yega na fin. Mas tristu ta, ku e trahadó i su famia no tin ni arte, ni parte, den e motibunan, sinembargo nan a bira víktima. 

Share This
error: Content is protected !!