KRALENDIJK – Radio Live99.9 FM a papia ku bosero di Kuerpo Polisial Hulanda Karibense (KPCN), Miluska Hansen relashoná ku e Toque de queda di 9or di anochi pa 4or di mardugá. Te ku ayera djamars esaki ta di 6 dia ta bai ku tur anochi mayoria parti di Boneiru, ta keda kontrolá tur kaminda ku ta na alkanse, pa mantené e medida aktual. Mester a eduká algun persona sierto momentu i splikanan, ken si por ta riba kaya i mas. Tin hopi hende no ta tuma e asuntu di ‘Toque de Queda’ na serio. Si nos mira kuantu esfuerso mester hasi pa evitá ku Covid-19 ta sigui plama riba e isla, nos no ta hasi wega ku loke ta sosodé awor.

Durante di e kòntròlnan den kuadro di kumplimentu ku e toke di keda riba djaluna 22 i djamars 23 di mart, polis a konstatá ku intenshonalmente tabata kometé aktonan pa stroba trabounan di polis. Asina tabatin por ehèmpel sendementu di kandela na Kaya Korona, na Kaya Tapajos, na entrada di Amboina i na Sentro di Bario Tera Kòrá. Entre otro tabatin tambe baranka poné riba kaminda na Kaya Nikiboko Nort, palèt ku sushi riba kaminda kla pa pega na kandela na entrada di bario Amboina i kònteiner di sushi bentá riba kaminda, loke ta peligroso i ta stroba polis pa hasi nan trabou. Tambe a konstatá ku tin hende ta sali pafó i tira vürwèrk ilegal kaminda tambe detenshon a kai.

A detené dos damsita ku tabata koriendo baiskel despues ku toke di keda a inisiá. Ta trata di e damsitanan di inisial T.J.N. di 16 aña i D.V.C.N. di 18 aña. A detené un terser persona, un hòmber di inisial M.M. di 20 aña, pa sendementu di kandela, pa resistensia durante su detenshon, pa no duna oido na òrdu di polis i pa aktonan baldadi.

Doño di un kas a haña un prosès ferbal komo e no tabata kumpli ku e ordenansa di emergensia; el a pèrmití formashon di grupo na su kas. Na un kunuku a papia estriktamente ku un grupo di hende i pidi nan pa bandoná e sitio. Algun establesimentu tabata habrí ainda despues di 8or di anochi pa benta di kuminda i/òf bebida alkohóliko. Direktorado di Supervishon i Mantenshon a sera e establesimentunan aki te un otro aviso. A kontrolá bichnan tambe pa aglomerashon i konsumo di alkohòl i a duna vários prosès ferbal i konfiská un kantidat di bebida alkohóliko.

Ta bon pa kòrda ku no ta solamente polis ta kore kontrolá riba kaya. Ta resultá ku brantwer i ambulans mester sali pa atendé ku situashon inesperadamente i djis imaginá si ambulans mester pasa di un kaminda pa yega un sitio ku tin un persona ku ta rekerí atenshon médiko urgente i topa ku un kaya blòkiá sin ningun motibu. Por kosta bida di hende kaminda por a yud’é, sinembargo debí ku e kaya tabatin opstákulo, a pone ku e Ambulans no por a yega rápido. Mi tin ku yama danki na esnan ku ta koperá ku tur e reglanan ku tin. Mi sa ku hopi hende ta keda kas i no ta sali riba kaya. Hopi bon, pasobra esaki no ta p’ami, tampoko pa polis. Di e manera aki nos ta kuida un otro ku si ta delikado pa e vírùs desastroso. Huntu nos tin ku kumpli pa tene Boneiru seif, pa kosnan por normalisá i nos por kontinuá ku bida manera tabata”, Miluska Hansen, bosero di KPCN a bisa.

E kòntròlnan riba kumplimentu ku e toke di keda ta kontinuá i si ta nesesario polis lo duna prosès ferbal òf hasi detenshon na momentu ku trata di kasonan kastigabel.

Danki na koleganan di NosTV pa e pòtrètnan durante e kòntròl na bichnan wikènt pasá kaminda a konfiská vários bebida alkohóliko i parti but pa aglomerashon.

Share This
error: Content is protected !!