KRALENDIJK – Radio Live 99.9 FM a sostené un entrevista ku pader Ivan Dario Perez Gomez, di parokia San Luis Beltran i kordinadó di ‘Caritas Bonaire’. Pader Ivan den e kombersashon, entre otro ta pone énfasis pa esnan indokumenta bakuná. 

“Nos ta traha ku esnan mas vulnerabel den komunidat i konhuntamente ku Gobièrnu di Boneiru i departamentu di Salubridat Públiko, nos ta trata mas tantu posibel, pa motivá tur hende pa aserka ku konfiansa pa bakuná. Sigur esnan mas vulnerabel i den e kaso aki indokumenta. Na Boneiru tin diferente persona ku nan situashon di salú no ta stabil, òf e hendenan ku no tin tur dokumentu di estadia i kisas otro situashon. Caritas tei pa yuda nan tur. Por tuma kontakto ku nos i pa por yuda nan ku ta rekerí ayudo. Tur imigrante ku pa un òf otro motibu ta den nesesidat di ayudo, tuma kontakto ku nos. No tene miedu i konfia den nos. Tin hopi informashon sirkulando relashoná ku e bakuna, sinembargo esaki ta un obra di Señor. Salubridat Públiko di Boneiru ta interesá pa tur hende traha un sita pa bakuná. Nan por yama Caritas Bonaire na number di telefon 795-1352. Yama i Caritas ta yudabo pa yega na un sita pa bakuná. E seguridat tei pa kada un di nos i no mester duda òf tin miedu. Aserka nos pa yudabo pa bakuná. Esaki ta importante pa kuida bo mes i otro nan den komunidat”, pader Ivan Dario Perez Gomez a bisa.   

Share This
error: Content is protected !!