KRALENDIJK – Boneiru ta den un situashon alarmante na e momentunan aki debí na e kantidat haltu di sifranan di kontagio di Covid-19. Den un korto tempu e kontagionan a subi drástikamente. Nos isla tin algun siman ta bai ku tur dia mas di 20 kaso nobo di e vírùs di corona. Esaki a sòru pa un preshon enorme riba e departamentu di Salubridat Públiko tambe, aparte di Fundashon Mariadal ku ta man yen ku personanan ku ta wòrdu hòspitalisá. E departamentu di Salubridat Públiko na promé instante tabata basta okupá ku personanan ku tabata yama un tras di otro pa tèst debí ku nan tin un òf otro síntoma. No por a kontesta tur yamada i personanan mester a yama diferente bes pa por haña kontakto ku un trahadó di callcenter pa por risibí un sita pa tèst. Despues a bini e asuntu di bakunashon aserka ku a sòru pa aun mas preshon. Un kantidat grandi di hende a bèl. Hendenan no tabata haña reakshon i a kere e ora ei ku e callcenter no tabata den uso. Pero henter ora e trahadónan tabata drùk ta kontestá telefòn. Komo ku asina tantu hende tabata yama, a habri liña èkstra kaminda a ekspandé e liñanan di e callcenter pa traha un sita pa e angua di corona tambe.

Awe djaweps 25 di mart 2021 nos isla tin un total di 446 kaso aktivo. E situashon i preshon riba e departamentu di Salubridat Públiko a bira asina grandi ku pa sigur mas di 1 siman kaba, trahadónan di e departamentu menshoná ku tin na nan enkargo e tarea pa yama duna resultado di tèst, monitòr salú di esnan positivo i yama esnan ku mester bai karentena praktikamente imposibel. Na e momentunan aki e departamentu menshoná no ta yama niun hende ku mester bai den karentena mas. Ta duna prioridat awor na solamente personanan ku a tèst positivo. Ta yama duna resultado, monitòr nan salú ounke esaki tampoko ta logrando manera mester ta. Esaki ta nifiká tambe ku e persona ku a tèst positivo pa Covid-19 mes tin ku yama tur esnan ku e tabata den kontakto di aserka kuné, pa informá nan pa drenta karentena 10 dia. Esaki ku tur su konsekuensia ku e tin kuné. Pues no tin kòntròl tampoko mas riba e kantidat di persona ku mester ta den karentena aki na Boneiru. Loke ta bou di kòntròl na e momentunan aki ta solamente e kantidat di persona hòspitalisá i kantidat di kasonan aktivo ku ta kuadra ku resultado di tèst.

Riba nos pregunta kiko ta bai pasa ku e sifranan, di e departamentu di informashon i komunikashon di Gobièrnu di Boneiru, Radio Live 99.9 FM a risibí e informashon ku ta pendiente pa bai kita e kantidat kompletu di persona ku ta den karentena komo ku esaki no ta bou di kòntròl mas. Ta nifiká ku kada persona tin ku karga su responsabilidat komo ser humano pa keda 10 dia máksimo den karentena i mester informá di imediato su dòkter di kas i e departamentu di SZW. Na momentu ku bo ta den karentena i bo haña síntoma, bo mester tuma kontakto mesora na e number 0800 – 0800 pa traha un sita pa tèst i no por sali for di kas ni tampoko bai trabou te na momentu ku bo resultado ta konosí.

Mas aleu den un reakshon pa Radio Live 99.9 FM, Gezaghèber Edison Rijna a konfirmá e notisia aki i ta hasi un yamada urgente pa tur hende kuida. Kuida i sigui kuida. Kumpli i sigui kumpli ku e medidanan. Nos tin chèns pa kambia e situashon na nos fabor. Ta dependé di abo, ami di nos tur si nos ta logra. Nos por. Basta nos ke. Ta pidi kada suidadano pa porfabor tene nan mes na reglanan di karentena i isolashon pero tambe pa kuida mas tantu posibel bo mes i esnan rondo di bo.

Share This
error: Content is protected !!