KRALENDIJK – Siman pasá un empleado di e kompania di limpiesa SELIBON N.V. a pasa den sustu na momentu ku el a konstatá algu peligroso, un artefakto ku koriente di voltahe haltu riba dje den algun yerba kantu di kaminda riba Kaya Korona. Radio Live 99.9 FM a komprondé ku a pone e empleado, un dama ku ta laborá pa e kompania pa sigur 10 aña riba non aktief pa motibu ku el a informá prensa pa bin tuma nota di e situashon ku por tabata lamentabel pa trahadónan di e kompania menshoná òf otro suidadano(nan) ku ta tráfika na pia den e area. Esaki sigur ta inakseptabel, kaminda un trahando ta konstatá algu peligroso i ta poné riba nòn aktif pa 1 siman sin pago.

Radio Live 99.9 FM siman pasá a risibí e informashon i a bai na e sitio kaminda por a konstatá ku e artefakto tabata simplemente riba tera i tin koriente haltu riba dje. Esei por a konstatá momentu ku e trahadó di SELIBON N.V. tabata hasiendo su trabou harpando i dado momentu a tende e zonido fuerte di koriente ku a chispa kandela tambe na momentu ku e harpa a pasa riba dje. Si e empleado di SELIBON N.V. su harpa kompletu tabata di heru, awe nos lo por tabatin un situashon di lamentá. Na dos okashon a topa ku e situashon riba Kaya Korona i na ambos okashon a hala atenshon di WEB N.V. pa remediá e situashon peligroso komo ku esaki por tin konsekuensia fatal pa hende òf bestia. Esaki Radio Live99.9 FM a hasi dor di pone e informashon riba su ‘facebook page’ ku e meta pa esnan konserní asumí nan responsabilidat i pa personanan ku ta kana na pia òf bishitá iglesia den serkania por ta na altura i pa tene kuenta ku e situashon peligroso.

Ta imposibel un persona hasiendo su trabou huntu ku koleganan i ta detektá algu ku ta peligroso, ta alertá e kompania WEB N.V. ku ta responsabel i demas persona ku por ta tráfika den e area, i e ta ta wòrdu di skòrs pa 1 siman sin pago. Gerensia di SELIBON N.V. mester a sostené e trahadó. No por ta asina tampoko, pasobra a pone prensa na altura di e situashon peligroso, ta skòrs e trahadó. Esaki ta inakseptabel! Por a duna e trahadó un ‘schriftelijke waarshuuwing’ kisas, pero e forma ku el a wòrdu tratá pa su doño di trabou no ta aseptabel bou di ningun kondishon! Mester pone e trahadó denter di 24 ora bèk na trabou. E trahadó no a hasi nada inkorekto pa e haña un trato, loke ta e kaso awor serka su doño di trabou. Mas aleu tin sospecho ku direktor di WEB N.V. tambe a pone preshon riba gerensia di SELIBON pa tuma medida kontra e empleado aki. Reportero di un matutino (korant di mainta) tambe a hunga un ròl importante den e asuntu aki dor di no protehá su fuente.

WEB N.V. no tin apsolutamente nada pa reklamá na SELIBON. Loke WEB mester a hasi ta atendé ku e situashon i remediá loke a konstatá ku ta sumamente peligroso na ámbos okashon. Niun momentu no mester a atendé ku SELIBON N.V. i pone preshon pa skòrs e trahadó. Si no tuma medida den e kaso, tin ku informá gezaghèber Edison Rijna i diputadonan di e situashon ku a surgi pa atendé ku e asuntu. Ta spera ku sindikato ABVO, Sr Robert Sances ku ta representá trahadónan di SELIBON N.V. tambe por kai den e asuntu aki mas rápido posibel.

Mas aleu Radio Live 99.9 FM a pidi un reakshon di bosero di SELIBON N.V. i el a informá, ku nan ta den un reunion i lo yama bèk pa un reakshon.

Share This
error: Content is protected !!