KRALENDIJK – Den luna di aprel fundashon Boneiru limpi i bunita den koperashon ku Selibon N.V. lo organisá un akshon di limpiesa “Clean up Drive Through”, un luna kompletu. E akshon di limpiesa akí lo bai tuma lugá den siman i tambe den wikènt. Apesar ku e pandemia di Covid-19 ta asotando nos komunidat, nos no ke laga esaki ta un opstákulo den nos kaminda pa sigui ku nos trabou di tene Boneiru limpi, bunita i mantené un medioambiente limpi i sano pa nos komunidat.Naturalmente nos lo mester mantené nos mes na e reglanan básiko di prekoushon stipulá dor di Entidat Públiko Boneiru. Nos enfatisá e pueblo di Rincon pa por fabor mantené distansha sosial di 1.5 meter, bisti tapaboka ora bin depositá bo shushi den e bakinan disponibel.Nos ta kuminsá pone énfasis riba e bario di Rincon. E bakinan di shushi lo ta situá na areanan stratégiko den Rincon Nort i Rincon Suit pa e “clean up drive through”. Lo bai konsentrá riba e shushi gròf i shushi di kurá manera yerba, palu i blachi.Tambe nos lo brinda den un forma aktrativo e servisio di limpiesa di terenonan privá den e bario di Rincon. Nos lo ofresé e servisio di rekohementu di shushi elektrodoméstiko manera wasmashin i stòf den e luna di aprel.E dos servisio nan menshoná ku ta limpiamentu di tereno i rekohementu di shushi elektrodoméstiko na kas lo mester wòrdu registrá via nos medionan di kontakto ku ta balie@selibon.com òf na telefòn: 7178159. Tambe por tene kontakto direktamente ku e Embahador di e bario di Rincon ku ta Jenny Coffie i tambe e miembronan di Fundashon Boneiru Limpi i Bunita.Nos ke konsientisá e pueblo di Boneiru pa tuma e tempu di krisis aki pa sigui mantené nos mediomambiente limpi i bunita pa asina nos sòru pa un forma di bida saludabel i seif.

Share This
error: Content is protected !!