KRALENDIJK – Durante e fin di siman último por a tuma nota di un kantidat di shushi bentá abou na altura di Kompleho Deportivo Jorge Nicolaas na Kaya Amsterdam ku ta fungi komo e sitio sentral di bakunashon. E shushi aki tabata di klikonan ku a wòrdu di bòltu probablemente pa buriku. E loke ku a hala atenshon ta e sakunan ku tabata kontené diferente artíkulo médiko. Por a mira klaramente e diferente artíkulonan médiko den sakunan di plèstik ku a wòrdu kibrá kreando un situashon a-higiéniko i ku por ta te asta dañino i peligroso pa otro persona nan ku ta trafiká den bisindario ku por bin den kontakto ku loke tabata abou na suela. Den e sakunan di plèstik tabatin entre otro pleister i katuna ku sanger na dje. Notisia Live 99.9 FM a drenta den kontakto ku Diputado di salubridat sra. Nina Den Heyer pa tende si e ta na altura di esaki i el a kontesta ku e no sa nada di esaki. E diputado no por a kere loke el a haña komo informashon i a tuma kontakto mesora ku diferente departamentu pa laga wak kiko por a bai robes ku e shushi di Kompleho Deportivo Jorge Nicolaas. No por ta posibel ku esakinan ta wòrdu bentá den un kliko normal ku tin otro tipo di shushi tambe den dje. Segun protokòl, shushinan médiko mester wòrdu atendé di otro forma pa wòrdu deshasí di dje kompará ku shushi di kas. Notisia Live 99.9 FM atento riba reklamo di un suidadano, a atendé ku esaki i pa e mesun atardi a rekohé e sushi na Kompleho Deportivo Jorge Nicolaas. Ta spera ku e situashon aki no ta bolbe ripití den futuro.

Share This
error: Content is protected !!