KRALENDIJK – Diputado James Kroon enkargá ku entre otro infrastruktura den entrevista ku Radio Live 99.9 FM, a papia tokante e rotònde nobo ku a keda konstruí na altura di Kaya Amsterdam i Kaminda Djabou. “Fin di aña pasá a para e trabounan na e rotònde menshoná i no a kontinuá  ku e trabounan debí na un investigashon ku tin andando di kosnan ku no a kana manera mester ta. Tabatin kosnan ku mester a studia mas mihó i a bin un rapòrt tambe. E intenshon ta ku pa otro siman gobièrnu di Boneiru lo konvoká un rueda di prensa pa duna informashon tokante trabounan di asfaltamentu ku lo bai tuma lugá i lo splika di e rotònde di Kaya Amsterdam i ki dia e trabounan ta kontinuá. Diputado Kroon ta pidi su diskulpa pa e tardansa ku tin debí na diferente faktor. Tin un rapòrt den konsepto. Na e momentu nan aki e departamentu di R&O ta mira tur e posibilidat nan i tur loke mester tene kuenta kuné. Lokual ku nos ta bai hasi den e dianan ku a sobra di e siman aki ta prepará huntu ku R&O e informashonnan ku mester duna durante e rueda di prensa i pa informá eksakto ki dia ta bai sigui ku e trabounan di asfaltamentu. Mi ta kere pueblo i gobièrnu tampoko no por warda mas ku ainda e trabounan na e rotònde aki no ta kla. Tin mas proyekto di asfaltamentu pa sigui entre otro Kaya Amsterdam mes ku ta den plan pa basta dia kaba,” diputado James Kroon a bisa.

Share This
error: Content is protected !!