KRALENDIJK – Djabièrnè anochi alrededor di 11or, notifikashon a drenta na warda di polis ku tin un aksidente di tráfiko riba Kaminda di Lac na altura di un supermerkado. E informashon risibí mas aleu tabata indiká ku algun persona den un vehíkulo pa un motibu òf otro lo mester a aksidentá kontra un pida muraya i tabata trata na hui. Mesora a dirigí varios unidat polisial den direkshon di e aksidente. Na yegada di e patruyanan polisial a bin enkontrá solamente e vehíkulo bandoná na e sitio. Probablemente esaki no por a kore mas debí na e daño material i a disidí di hui na pia lagando esaki atras mirando ku tabata orario di toke de keda.

Habitantenan den bisendario a indiká ku e Toyota Vitz shinishi aki tabata biniendo ku velosidat haltu i a bai trata na lora drenta Kaya Macario Sint Jago. Debí na velosidat haltu, e shofùr a pèrdè kòntròl den e bògt i a bai dal kontra un pida muraya. Despues di unratu a mira vários persona na kareda ku a bai pèrdè den skuridat lagando e vehíkulo atras. Outoridatnan polisial mesora a start un investigashon i a kuminsá un buskedá den bisendario di Jossy Boekhoudt Ballpark. Despues di algun ratu na e sitio, un hóben a presentá na pia i indiká ku e tabata shofùr di e vehíkulo. Debí na spantu i e orario di toke de keda, el a bandoná e sitio. A puntre pa su demas kompañeronan pero e no por a duna un kontesta. A papia serio kuné i a duna e hóben aki un bon skual di kual e lo risibí tambe un but pa ta riba kaya sin pèrmit durante Toke de keda. E tabatin algun raspu ku tabata basha sanger na su pia. CRS i un kran a presentá pa tou e vehíkulo i transporté for di e sitio.

Share This
error: Content is protected !!