KRALENDIJK – Diputado James Kroon enkargá ku entre otro infrastruktura den entrevista ku Radio Live 99.9 FM, a papia tokante e situashon den sentro di suidat despues di e trabounan di kobamentu pa e proyekto di renobashon di e liñanan di awa di irigashon ku mester transportá awa di irigashon bèk pa hotèlnan.

“Na momentu ku Kaya Grandi a wòrdu kibrá pa pasa pipanan di awa di irigashon, di parti gobièrnu tantu mi persona huntu ku Diputado Hennyson Thielman i Diputado Nina den Heyer a papia tokante esaki i nos deseo tabata mesora pa drecha nos sentro di suidat i hasié mas bunita i atraktivo. Tin un plan práktikamente kla atendé pa un arkitekto lokal i e idea ta pa Kaya Grandi kompletu bira di klenku. Pronto nos lo duna presentashon kaminda por mira kon nos sentro di suidat lo bai keda. Mientrastantu a sera e partinan ku a kibra ku klenku i algu di asfalt. Mi a tuma nota di diferente reklamo riba medionan sosial ku despues di e trabounan di kobamentu, Kaya Grandi ta un mahos bista. Esaki no ta bai keda asina aki. E gobièrnu aki i nos tur tres komo diputado a bisa ku nos ke bai hasi Kaya Grandi mas bunita i e fondonan tambe tei pa hasi esaki. Solamente tin ku presentá e proyekto na komunidat den e dianan benidero. Un tiki pasenshi i pronto Kaya Grandi lo ta bunita pa asina nos tur komo habitante i turistanan por sinti ku nan ta den sentro di suidat.

Pa loke ta e situashon di e sobrá kareteranan, tambe nos tin prekupashon pa esaki i ta buskando manera pa haña mas fondo pa por drecha e kamindanan ku a koba pa pasa pipanan di awa di irigashon. Esaki pa krea un bista un tiki mas bunita pa lokual ku nos ta mira na e momentunan aki. A palabrá ku e kompania ku ta enkargá ku e proyekto di renobashon di e liñanan di awa di irigashon pa asfaltá bèk loke ku nan a koba.

YACHTHAVEN HARBOUR VILLAGE

Komo diputado mi a trese mi ideanan dilanti pa por konstruí un brùg na e sitio kaminda awa salu ta subi tera i tambe pa krea un sitio ku piskadónan, doño di boto chikitu por pasa i pone nan boto. Nos ta den kombersashon ku Harbour Village ku tambe tin un proyekto pa e sitio. Awor aki ta e momentu pa bini ku un solushon duradero i drecha mesora henter e situashon na yachthaven, mirando ku tin trabounan pa pasa tubunan di awa di irigashon tumando lugá,” diputado James Kroon a bisa.

Potrètnan ta ilustrá situashon di Kaya Grandi despues di trabounan di kobamentu.

Share This
error: Content is protected !!