KRALENDIJK – Désirée ‘Daisy’ Coffie di Frakshon Coffie, a manda un karta pa gezaghèber Edison Rijna i Kolegio Ehekutivo relashoná ku e trabounan na e rotònde na Kaya Amsterdam ku tin 4 luna pará pa investigashon. “Dia 11 di aprel 2021 ta eksaktamente 4 luna ku a sera e rotònde na Kaya Amsterdam ku e partisipashon ku lo mester hasi un investigashon pa haña sa si e proyekto aki a keda ehekutá korektamente. Relashoná ku esaki, ya 17 di yanüari 2021 mi a dirigí un karta na Kolegio ku 8 pregunta i sup-pregunta pa haña aklarashon riba e situashon i mas ku tur kos ki dia por a spera ku lo a terminá e proyekto i kontinuá ku rehabilitashon di Kaya Amsterdam i despues Kaya Gobernador Debrot.

Lamentablemente mi no a risibí ningun reakshon riba e preguntanan menshoná den e karta di 17 di yanüari 2021. Mas di lamentá ta ku te dia di awe ningun pero ningun informashon ofishal no a sali di parti di gobernashon pa responsabilisá e situashon na komunidat di Boneiru, e pagadó di belasting ku tin e derecho di por kore riba kareteranan bon i sigur. E úniko informashon ku a sali ta un deklarashon di e direktor nobo di R & O ku a laga hasi un investigashon i ku tanten no tin resultado di e investigashon no ta responsabel pa habri e rotònde pa tráfiko.

Kolegio mester ta di akuerdo ku’mi ku un situashon asina ta en pugna di e prinsipio di bon gobernashon, esta di transparensia i responsabilisashon di ehekushon di un maneho, spesífikamente pa ku nos kareteranan ku tin desenia den un estado malísimo ku tur su konsekuensianan pa e outomobilistanan pa loke ta seguridat, pero tambe ku ta kousando daño material grandi na tur e vehíkulonan ku ta trafiká riba nos kareteranan.

E situashon ta tambe un falta total di rèspèt pa e usuarionan di nos kareteranan, ku diariamente mester trafiká riba nos isla pa kumpli ku nan obligashonnan diario, manera bai trabou, hiba e trese mucha skol, transporte di servisio i produktonan, ets. ets. Mi no ke papia mes di e peliger ku e situashon aki ta kousa pa peatonnan.

Ademas e situashon aki ta un prueba palpabel di no kumplimentu di e akuerdo di gobernashon será na novèmber di 2018 kual akuerdo Konseho Insular a bai unánimemente di akuerdo kuné. Motibu di “ku no tin fondo” tampoko por ta un argumento bálido mas debí ku gobièrnu di Reino, – konfirmá resientemente pa sekretario di estado ante “Eerste Kamer”- a pone fondonan supstansial pa rehabilitá nos kareteranan. Forsa di ehekushon tampoko ta un argumento ya ku e proyekto spesífiko di rotònde a haña aprobashon i a keda asigná na un kompania lokal bou di supervishon.

Un komunidat mester por konta a base di konfiansa ku gobièrnu ta kumpli kabalmente ku su tarea. Den e kaso aki tambe mi mester konstatá lamentablemente un violashon di e prinsipio di konfiansa. Mi no por imaginá mi mes ku nos gezaghèber, responsabel pa seguridat riba nos isla no ta duna ningun señal di preokupashon pa e situashon aki, mirando ku servisionan manera brantwer, ambulans i polis tin hopi molèster pa ku e situashon, spesialmente den kasonan di urgensia.

Mi no por konkluí otro ku e situashon ta un muestra di inkapasidat total di Kolegio Ehekutivo. Pa tal rason, mi ke urgi Kolegio Ehekutivo pa den un forma inmediato pone na disposishon di Konseho Insular e rapòrt di e investigashon relashoná ku e rotònde pa asina Konseho Insular (komunidat) por tuma nota di e resultado di e investigashon i e rekomendashonnan ku a keda hasí pa remediá e situashon, indikando tempu den kua e rehabilitashon aki lo tuma lugá i e rotònde lo keda habrí pa tráfiko.

Tambe mi ke supliká Kolegio Ehekutivo pa informá Konseho Insular e plachi finansiero di e proyekto aki den su totalidat, inkluso e posibel “meerkosten” di e proyekto i esnan responsabel pa e daño finansiero ku e retraso grandi aki a trese kuné.

E situashon riba su mes i e aktitut di Kolegio Ehekutivo den esaki ta simplemente inakseptabel pa Konseho Insular i pa henter komunidat, pero ta tacha tambe en grande e kredibilidat di Kolegio Ehekutivo pa loke ta su kapasidat pa goberná e isla aki”, Daisy Coffie, di Frakshon Coffie a bisa den su karta na promé mandatario di nos isla i pa Kolegio Ehekutivo.

Share This
error: Content is protected !!