KRALENDIJK – Désirée ‘Daisy’ Coffie, Miembro di Konseho Insular di Boneiru a manda un karta ku pregunta pa Kolegio Ehekutivo i Gezaghebber Edison Rijna tokante e investigashon pa posibel inregularidatnan na BonLab for di komienso di 2020 kaminda a pone e direktor di BonLab N.V. riba “non-actief” mientras ku te awe ningun akshon a keda tumá a lo ménos visibel pa komunidat.

“For di komienso di aña 2020 ku aprobashon di hunta di komisario i reunion di akshonistanan di BHM, a pone direktor di BonLab N.V. riba “non-actief” pa a laga hasi un investigashon pa posibel inregularidatnan na BonLab.

Nos ta na aprel 2021, 16 luna mas aleu i siendo ku -segun nos informashon- e investigashon a keda konkluí i poné den un rapòrt, te awe ningun akshon a keda tumá a lo ménos visibel pa komunidat. Un situashon indeseabel i no korekto.

Na promé lugá pa e direktor en kuestion, kende ta na kas kobrando salario, pero sin ningun klaridat pa ku su posishon. Na di dos lugá den kuadro di transparensia, komunidat -ku al fin al kabo ta doño di e kompania BonLab- tin derecho di risibí informashon pa ku e situashon ku a surgi i ku a trese bastante inkietut i preokupashon bou di komunidat en general, pero tambe bou di e personal di BonLab. Na di tres lugá e situashon na BonLab no ta pará riba su so, sino ta den e kuadro di e esfuerso ku Kolegio Ehekutivo a entamá basá riba rapòrt CRM-Link pa pone tur e kompanianan yu di Bonaire Holding Maatschappij funshoná finansieramente saludabel.

Pa tal rason, mi ke hasi uso di nos Reglamentu di Ordu, art. 45, pa hasi atraves di Kolegio Ehekutivo, ku ta forma parti alabes di e Reunion di Akshonistanan di BHM, kual ta e akshonista di BonLab, e siguiente preguntanan:

  1. Kiko Kolegio Ehekutivo por informá Konseho Insular di e investigashon relashoná ku posibel iregularidatnan na BonLab?
  2. Na ki konklushon(nan) e investigashon na BonLab a yega?
  3. Ki rekomendashon(nan) e investigashon a indiká pa hasi BonLab un kompania saludabel atrobe?
  4. Ki medida ta rekomendá pa tuma pa ku e direktor ku aktualmente ta riba “non-actief”?
  5. Den kuadro di transparensia di gobernashon Konseho Insular lo ke risibí -si tin- e rapòrt i tur otro dokumento relevante di investigashon aki.

Mi ta konta di risibí kontestanan oral, al kaso den e próksimo reunion públiko di Konseho Insular”, Daisy Coffie a bisa.

Share This
error: Content is protected !!