KRALENDIJK – Riba19 di aprel 2016 dilanti notario Kenneth Arends, 7 sindikato representá pa nan presidente a pasa e akta notarial di lantamentu di Union SIndikal BOneriano, USIBO.. Tabata Marcelo “Chaly” Anthony di ABVO, Nilco Rollan di AFBW, Gabriel Pourier di BPWU, Gerold Bernabela di FEDEBON, Charles “Charly” Mercelina di NAPB-BES, Alex Molina di PWFC i Gilbert van Arneman di parti di SIMABO huntu ku Norwin “Nòchi” Willem ku a firma e akta notarial di lantamentu di e Union sindikal. Ku e firmamentu ei un soño a bira realidat. De fakto e union aki a kuminsá for di 1 di mei 2012, ora tur e sindikatonan aki a konmemorá Dia di Labor huntu den kurá di AFBW. Meta prinsipal di USIBO ta pa bos di e trahadó zona i partisipá aktivamente den desaroyo sosial ekonómiko di Boneiru. E organisashonan a bin realisá ku ta trahadó, representando labor huntu ku dunadó di trabou, representando e kapital i gobièrnu, representando e fasilitadó ta e tres pilarnan, e tres piedranan di fogón ku ta forma e motor di e desaroyo sosial-ekonómiko di Boneiru. Ku e konsiensia aki tambe mesora USIBO a tuma e inisiativa pa lanta un plataforma tripartit pa den un forma formal atendé ku e temanan makro-ekonómiko di nos isla. E plataforma aki a bira loke nos konosé awe komo Dialogo Sentral. Tabata diputado Silvania Servilia ku durante e konmemorashon di DIA DI LABOR riba 1 di mei 2013 a tira e hanskun ku a keda un bes rekohé pa sindikalismo i den ofisina di AFBW a sinta e diputado kompañá pa sr. Rafael Santana, miembro di konseho insular pa kua frakshon sra. Silvania tabata diputado i sr. Hans Els, konsehero huntu ku e sindikatonan pa a formulá e pensamentu di e Diálogo Sentral. Di parti di e sektor di dunadónan di trabou, tabata sra. Anja Romeyn, kende a hunga un papel pa trese Bonaire Buisiness and Employers Assocation na bordo di e plataforma. Tabata na 2018 ku a duna e plataforma un bachi nobo ku e “AKUERDO DI SALIÑA”(Zoutpannenakkoord) ku ayudo di ministerio di Asuntunan Sosial, kende mesora a rekonosé e importansia di e plataforma komo un partner pa dialogá kuné riba e temanan sosial-ekonómiko. E fundeshi riba kua e Diálogo Sentral ta konstruí ta Igualdat, Konfiansa i Rèspèt pa otro su interesnan.Tres pilar sólido. Durante e añanan e partidonan a invertí hopi tempu i energia pa krea e konfiansa aki dor di konstruí brùg i no lanta muraya. I mester bisa ku e esfuersonan aki a paga i awe nos por bisa ku orguyo ku e Diálogo Sentral a gana su lugá i posishon den nos komunidat. Durante e añanan ku a transkurí e Diálogo a prueba su derecho di eksistensia. USIBO a kumpli tambe ku e otro metanan poné den su statuto, kual ta entre otro duna asistensia na e sindikatonan miembro. Entre otro e asistensia aki a konsistí di sinta na mesa komo konsehero den negosashon di diferente CAO-nan ku e sindikatonan a negoshá ku kompanianan pa nan miembronan. Por menshoná entre otro CAO-nan na Fundashon Mariadal, Fundashon Cas Boneriano, WEB N.V. Contour Global, Stinapa, Bonaire Warehouse, Kooyman N.V. Hotel Flamingo, Plasa Hotel, Bopec pa loke ta e personal di staf. Tambe USIBO a duna asistensia den problemanan interno sindikal, manera SIMBO, NAPB-BES, na Curoil. Ademas USIBO a logra ku anualmente tur sindikato ta konmemorá DIA DI LABOR huntu. Ta di spera ku e UNION aki lo keda kon tal ku tur sindikato karga nan responsabilidat den e union i ku ohalá den e próksimo 5 añanan logra ku USIBO lo por traha pa yega na un Sentral Statutario di tur sindikato aki riba nos isla, E bentahanan di un sinergia sindikal asina lo ta di gran balor pa duna e klase trahadó e lugá pero mas ku tur kos e rèspèt i rekonosementu ku e trahadó meresé den nos komunidat. E klase trahadó tin tur derecho di partisipá den e prosperidat i bienestar ku un desaroyo sosial-ekonómiko duradero ta krea pe i su famia. Den esaki mester ta bon kla ku trabou ta paga i ta paga bon mas tur otro kondishonnan sekundario ku nos tempu ta eksigí. Un trabou ku USIBO ta konsiderá di gran importanisa pa e tempunan benidero ta formashon di un generashon nobo i hóben di lidernan sindikal pa garantisá eksistensia di sindikalismo den nos komunidat. P’esei un yamada na hóbennan, nan young profesionals pa djòin sindikalismo pa bira e relevo di e generashon ku a karga sindikalismo te awe na 2021. Kontinuashon di esaki ta den boso mas.

Share This
error: Content is protected !!