KRALENDIJK – Djasabra último 17 aprel 2021, algun miembro di Sv La Fama a yega Fèlt Pariba i kuminsá hinka e promé stakanan pa den siman aki di 19 aprel 2021, sigui hinka mas staka pa djasabra 24 aprel 2021 ku Dios su poder, hala waya pa sera e kurá pa por kuminsá fokùs riba drechamentu dje fèlt pa treinennan por sigui. Un danki ta bai na diputado di deporte sr. James Kroon, ku a hinke skouder bou di esaki, meskos ku sr. Ludwig Balentin di Federashon Futbòl Boneriano, pa Sv La Fama por a haña e stakanan i waya pa por sera e fèlt den un kurá. Manera Sv La fama a bin ta mustra foi komienso, e ekipo tin miembronan ku un kurason pa ku e bario di Rincon i restu di Boneiru.Praktiká futbòl i hasi algu ku ta kumbiní nos kada unu. No solamente nan ekipo so, pero un i tur. Ku esaki den futuro ku Dios ke, tin un kompleho deporte ku bida i Salú, kaminda un i tur por hasi deporte teniendo nan mes na reglanan ku lo keda stipulá pa asina por mantené e kompleho deportivo, mirando ku hopi bia ta grita pa lugánan pa hasi deporte, ta haña e fasilidatnan pero no sa di mantené esakinan. Un danki ta bai tambe na e spònser di shirtnan di Sv La Fama ku ta Krioyo paint, señor Arnold de Jong ku a opsekiá bibidanan pa refreská garganta durante e trabounan. Tambe e sr. Robby Winklaar ku a tende dje trabounan di djasabra 17 aprel ultimo i yuda koperá pa e boluntarionan por a haña algu èkstra pa refreská garganta. La Fama ta kontrolá bon pa hopi persona no ta na fèlt n’e mésun momentu durante e trabounan i ta sòru partí e gruponan pa e trabounan por kana. Un danki na Benito Koffie dje empresa “ECHO RINCON” ku ta bai yuda ku un mashin ku ta klaba e stakanan mas lihé. Nan tur ta ku un kurason pa e bario di Rincon. Esei ta di apresiá, pasobra huntu nos ta krea algu pa nos mes i esnan ku ta sigui nos mañan. Esaki di akuerdo ku sr. David Molina presidente di Sv La Fama.

Share This
error: Content is protected !!