KRALENDIJK — Den rueda di prensa ku a keda konvoká pa Gezaghebber i EBT tim awe mainta a menshoná ku Boneiru lo baha di nivel di riesgo i bai nivel 4. Naturalmente esaki ta un suavisashon pa e situashon aktual mirando ku e kaso nan aktivo ta bahando i e preshon riba kuida a bira ménos. Esaki ta nifiká ku tin diferente kambio pa ku diferente aria. Nos lo menshoná e kambio nan ku lo drenta na vigor desde mañan 23 di aprel i ta bálido pa 3 siman.

– Ta bai sali di nivel di riesgo 5 bai 4. Toke de Keda ta kita i lei seku lo no ta na vigor mas pa awe 12or di marduga.

– Por konsumí alkohòl den aria nan públiko. Tur esaki nan ku durashon di 3 siman i ku posibilidat di suavisá mas medida promé ku tempu stipulá

– Negoshinan di kontakto manera kápsalòn, barbershop, spa etc. por habri bèk

– Horeka  por habri te 10or di anochi i por sirbi alkohòl

– Kasino por habri i kantor nan di bende number por habri bek i tambe por bende brièchi.

– Negoshi nan no vital por habri bek

– Gym i misa por habri bek, teniendo nan mes ku regla nan di higiena.

– Por práktika deporte den airu liber, pero kampionato i kompetensia no ta permití ainda.

Gezaghebber ta kontentu ku e komportashon di e pueblo i ta gradisí kada habitante ku awe nos por baha di nivel di riesgo i suavisá e medidanan.

Share This
error: Content is protected !!