Direktiva di Fundashon Mariadal (F.M.) i Federashon General di Trahadónan di Boneiru (A.F.B.W.)  a kuminsá ku e proseso pa kuminsá negoshá un CAO nobo pa e trahadónan di e fundashon aki.

E CAO aktual (2019 – 2021) lo kaduká, desèmber 2021.

AFBW konhuntamente ku su direktiva i su shopsteward nan a manda un karta pa F.M. pa asina aki por a kuminsá ku e apertura.

Dia 27 yanüari 2021, tabata tin e promé reunion pa ku apertura pa un CAO nobo (2022 – 2024), di parti AFBW a trese i pidi pa traha un CAO den konsepto nobo, F.M. a honra e petishon aki.

Konhuntamente ku shopsteward nan i ku miembronan di direktiva di AFBW, departamentu F.M. a kuminsá bòrda esaki ku e salida di e CAO 2011 -2012 ku a dura te ku 2018.
Motibu ku a hasi e petishon aki ta e tantísimo reklamo nan ku a haña den transkurso di aña nan di diferente miembronan riba e CAO 2019 – 2021.

AFBW ke kana e kaminda di e negosiashon aki ku abo komo miembro, pa es motibu aki siman pasa tabata tin tres (3) anochi di informashon via e sistema virtual digital Zoom. Mirando ku pa motibunan di e situashon di Covit 19, ta imposibel pa por yama un reunion general ku tur e miembronan di e departamentu di F.M.

Siman pasa dia diesinku (15) di aprel a entrega e CAO konsepto na Fundashon Mariadal.

AFBW kier a gradisí un i tur ku a partisipá den promé fase aki, pa por sigui ku e negosiashon di e  CAO nobo aki.

Direktiva i shopsteward nan AFBW / F.M. ku hopi entusiasmo i positivismo ta mira riba un negosiashon ku lo ta na benefisio di e klase trahadónan di Fundashon Mariadal, ku ta hasiendo un gran trabou den e temporada nan difísil ku nos ta bibando aden pa ku e epidemia di Covit 19.

Huntu nos lo logra esaki, “Den Union Tin Forsa”

Share This
error: Content is protected !!