KRALENDIJK – Awe riba dia di Mama Tera, Fundashon Echo ta lansa un petishon pa protekshon di un parke di Naturalesa den kurason di Kralendijk. Despues di a dedika mas ku 5 aña di reforestashon Echo ke pone atenshon na protekshon di e area nan bèrdè awe riba dia internashonal di Mama Tera, kual ta hiba komo tema: Hunto nos por restorá nos mundu ! Organisashon nan di naturalesa huntu ku habitantenan di Boneiru ta hasi un yamada na gobièrnu di e isla akí pa designá un mondi trópiko seku huntu ku e parti mas pariba di Saliña di Vlijt komo parke di naturalesa pa rekrashon i edukashon. Pa esaki a traha un petishon ku habitante i bishitante por firma online. Ta bai pa un tereno di mas o menos 27,5 hèktar entre Kaya Amsterdam, Kaminda Djabou i Kaya Sirena. E tereno no tin un destinashon elaborá den Plan di Desaroyo di Espasio di Boneiru.

Parti nort, e parke di siudat en kestion ta keda pegá ku Saliña di Vlijt. Entidat Públiko Boneiru ta desaroyá aktualmente e parti pariba di e saliña pa un área di awa ku ta atraktivo pa para di awa. Tur dos área ta forma un parke di Naturalesa den centro di siudat ku ta aksesibel pa públiko ku ademas di balor ekológiko tin tambe balor rekreativo i edukativo haltu. A duna Harbor Village e parti pabou di e saliña i e naturalesa pegá ku esaki na èrfpagt. Den e mondi trópiko seku aki tin por lo ménos 24 diferente mata i palu. Den esakinan tin vários mil yatu i kadushi ku ta duna kuminda na 21 sorto di para, raton di anochi i reptil. Vários sorto di palu (manera Wayaká), para (manera Lora) i raton di anochi ta lokalmente protehá pa lei. Un karakterístika importante di e área ta ku ei bestia no ta kome yerba asina tantu manera na otro sitio na Boneiru. Ehemplar nobo di palu ta sigui bini na lugá di esnan bieu. E área en kestion ta ofresé un oportunidat úniko pa mantené un área di naturalesa seku i muhá bunita den kurason di Kralendijk pa habitante i bishitante. Esaki ta pas perfektamente ku e imágen di amigu di naturalesa ku Boneiru tin. E tereno ta keda den serkania inmediato di bario, hotèl i skol kual ta hasie atraktivó pa rekreashon i edukashon. E organisashonnan lokal di naturalesa Echo Bonaire, WildConscience, CARIBSS, BirdsCaribbean, BonBèrdè i Tera Barra ta sostené e petishon. Firma e petishon online na: www.change.org of bishita facebook pagina di Echo Bonaire pa mas informashon. Awe mas ku nunka laga skucha bo bos i firma e petishon !

Share This
error: Content is protected !!