KRALENDIJK—Pa PROMÉ BIA BONEIRU TA BAI KOMPETÍ DEN ‘CARIBBEAN MOTOR SPORT FESTIVAL 2021’ aya na Sint Maarten. Miéntras ta prepará pa e aktividat anual ‘CARIBBEAN MOTOR SPORT FESTIVAL 2021’, djasabra último e organisashon ‘Sint Maarten Automotive Federal’ (SMAF) a organisá un seremonia relashoná ku e aktividat menshoná ku ta tuma lugá na luna di yüli. Boneiru, Kòrsou i Aruba ta bai kompetí den e aktividat. Durante e aktividat por a tuma nota di diferente persona di otro organisashon. Entre otro tabata presente representantenan di ‘Sint Maarten Bikers Association’, ‘Sint Maarten Drifting Association’ i esnan di ‘Sint Maarten Drag Racing Association’.

Alex Deming di Sint Eustatius di ‘COMOSUFE Alliace’ tambe tabata presente i a menshoná durante e anochi, ku pustamentu ta desaroyando rápido riba e isla. Nan ta den proseso pa yega na un tereno pa konstruí in pista pa dragrace, el a bisa.

E presidente di SMAF, Charles Benders, a ekspresá kon gobièrnu di Sint Maarten no tin masha interes den e deporte di dragrace. E aktividatnan di pustamentu ta tuma lugá na e parti Franses i tin un bon palabrashon entre e organisashon i e gobièrnu, pa tur kos kana organisá. “Otro islanan den e área tin atenshon di nan gobièrnu i ta mira e benefisio ku dragrace ta trese. Kiko ta e motibu ku na Sint Maarten no por? Debí ku no tin un pista riba e isla, ta pone ku no por desaroyá e deporte den su totalidat. Si tin un pista esaki ta yuda ku pustamentu ilegal riba kaya òf ponementu di fever, “ el a bisa.

SMAF a invitá partisipante nan for di Aruba, Boneiru i Kòrsou pa kompetí den e ‘Annual Caribbean Motor Sport Festival’ (COMOSUFE). Esaki a sosodé den koperashon ku Jenny Martis di Kòrsou (Still Balling Racing), e persona ku a hasi posibel pa Bonaire por bai kompetí aya na Sint Marten. E aktividatnan ta kuminsá 9 di yüli i ta terminá 25 di e luna. Ta trata di diferente aktividat ku ta tuma lugá durante fin di siman na luna di yüli. Entre otro ta bai tin fever, dragrace, drifting i mas. Partisipante di 5 isla ta bai kompetí durante e luna aya na Sint Maarten. Ta trata di: Boneiru, Aruba, Kòrsou, Sint Eustatius i Sint Maarten.        

Share This
error: Content is protected !!