KRALENDIJK – Djabièrnè último Boneiru tabata testigu di un konferensia di prensa históriko tratando un di e temanan mas influente pa e periodo di gobernashon aki. Nos ta denominá e konferensia di prensa en kuestion, komo históriko, pasobra e ta duna muestra ku Boneiru poko poko pero sigur ta klarando e komplikashon nan ku ta inherente na adaptashon pa un struktura nobo. Diputado Kroon den e kaso aki, despues di un lucha interno formal, a logra yega na e tim korekto pa atendé ku e situashon di nos kareteranan. E lucha aki no tabata unu fásil, espesialmente si nos tene na kuenta ku opinion públiko ku nan rason tabata pone hopi preshon riba e tópiko aki. Pa nos di UPB ta un satisfakshon pa mira kon e proseso a kana i ku desishon importante a keda tumá. Nos ta referí na e desishon pa duna kontenido real na e gritu pa transparensia esta di organisá mensualmente, sekshonnan di informashon tokante di plannan, proseso i akshonnan na kaminda òf ku ta den ehekushon. Nos di UPB ta kere den e método aki pasobra banda di kaba ku mal informashon dor di suministrá informashon korekto, e ta pone na mes momentu un preshon interno pa produsí, loke ta na fabor di Boneiru. Nos kier asentuá ku na e altura ku nos ta aki, den e proseso pa pasa di e struktura bieu pa e struktura nobo, tur kos ta kompliká, tur kos ta nobo i tur kos ta wòrdu mirá ku wowonan diferente.Pasobra tur hende ta buskando pa haña e kaminda nobo i ningun hende no ke hasi fayo. Esaki ta pone un preshon adishonal riba tur ku ta traha i ta eksigí tambe un aktitut proaktivo di un i tur, pa tòg realisá proyektonan na benefisio di nos pueblo. Pues, fásil e situashon no ta. Nos sinembargo ta konfia den e eksperensia polítiko di diputado Kroon, pa huntu ku su e ekipo di R&O, produsí e resultadonan ku pueblo di Boneiru ta spera riba dje. Finalisando, nos ke felisitá un biaha mas, diputado Kroon ku e desishon pa brasa transparensia i e konsepto di informashon komo base pa kombatí mal informashon i produsí resultado tangibel pa nos pueblo, ora ta trata estado di nos kamindanan. Bon trabou, ban pa mas!

Share This
error: Content is protected !!