KRALENDIJK – Un bes mas nos a yega na  Dia di Labor, ku USIBO i e sindikatonan ku ta afiliá na dje no por selebrá e dia tan importante aki en grande, ku nan miembronan. 

E pandemia i e medidanan implementá pa gòbièrnu ta pone ku mester ta kouteleso ku aglomerashon.

No tabata un aña fásil den sentido ku no por a yega hutu tur ora i tin reunion I aktividatnan ku mester  a sigui pa medio virtual i otro aktividatnan ku mester a kanselá.

Dia Di Labor tin signifikashon grandi pa USIBO mirando e balor i lucha ku a hiba pa e klase trahadó. Base di e selebrashon di 1 mei ta e introdukshon di labor di 8 ora pa dia, ku for di den siglo 15 i 16 tabata un gritu ku por a skucha frekuentemente.

Na e kongreso internashonal na 1891a konstatá tres meta prinsipal ku ta e lucha pa dia laboral di 8 ora, bringa pa otro derecho laboral i pa mantené pas.

USIBO ta tuma nota ku den e siglo aki ketu bai e 3 meta prinsipal aki ta i ta keda un lucha. Derecho I deber di trahadónan ta ankrá den un kombenio laboral kolektivo.. E kombenio laboral kolektivo ta manera un beibel pa e trahadó, ku e mester hasi esfuerso pa e tin konosementu profundo di su posishon hurídiko. A base di e kontrato kolektivo e dunadó di trabou ta traha un konbenio laboral, esaki ta palabrashon individual ku e dunadó di trabou ta hasi ku e trahadó.

Na momentu ku e trahadó konosé su kontrato kolektivo pero tambe su kombenio laboral, e por defendé su mes pero tambe vigilá si ta kumpli ku loke tin den e kontrato laboral.

Pero realidat ta kompletamente otro. I ta di lamentá ku te ainda tin situashonnan ta sosedé´na boka di trabou ku ta trapa e derecho di e trahadó.

S un trahadó tin konosemntu di su kontrato laboral I ta dominá e leinan ku ta regardá labor, e ta mihó prepará pa por defendé sum es den kualké situashon ku ta bai kontra di su posishon hurídiko

E deber di un trahadó ta apliká konosementu di su estudio i e instrukshonnan di su dunadó di trabou, hasi uzo korekto di medionan ouksiliar i medionan pèrsonal pa seguridat, sigui  instrukshonnan di seguridat, kolaborá na un bon implementashon di maneho, detektá i mèldu peliger pa seguridat i salú, sigui kursonan riba diferente tereno.

Tambe e tin e deber di yega tempran na boka di trabou, aportá na produktividat,

USIBO huntu ku e sindikatonan afiliá su punto di lansa lo ta pa bin ku tayernan kaminda ku tantu direktiva pero tambe miembronan afiliá na e diferente sindikatonan por risibí konosmentu i hèrmèntnan pa yuda nan sigui desaroyá den emundu sindikal.

Di e forma aki USIBO ta kumpli ku e metanan den su satuto ku ta artíkulo 2 insiso 3 Organisá kursonan pa lidernan di sindikato i trahadónan.

Artíkulo 2 insiso 4 Promové e klase trahadó pa nan afiliá na un sindikato

En un era kaminda ainda ta trapa riba derichinan di e klase trahadó ta di suma importansia pa tur trahadó na Boneiru tin konosementu di leinan laboral i di su posishon hurídiko.

Un trahadó den kualke area di labor ku ta bon prepará, ku tin konosementu di su derecho i debernan ta un trahadó ku por defendé su mes i su posishon hurídiko.

Un trahadó ku ta afiliá na un sindikato tin e benefisio di risibí konseho hurídiko, konseho pèrsonal riba trabou i skal di salario, influensia riba kondishonan laboral, influensia riba reorganisashon òf fushon, treining i tayernan i un aspekto hopi importante ta ku huntu bo ta forma un mokete mas grandi kontra inhustisia laboral.

USIBO ta deseá tur trahadó en general i tur trahadó di  e sndikatonan afiliá na USIBO en prinsipal un dia di labor yená ku bendishon i reflekshon.

Ku union semper lo vensé tur opstákulo i ku huntu nos por logra lo máksimo pa e klas trahadó

Felis Dia di Labor.

Share This
error: Content is protected !!