Hòmber ta kore bai despues di aksidente

Den oranan di anochi riba djabièrnè 30 aprel, a detené un hòmber di inisial N.J.M.V. di 29 aña, na altura di Kaya Prenses Marie en konekshon ku e duna oido na òrdu di polis. E sospechoso tabata enbolbí den un aksidente despues di kua ela purba kore bai.

Robo

Alrededor di 11.30 or di anochi riba djaweps 29 di aprel sentral di polis a risibí notifikashon tokante un robo ku a tuma lugá riba Bulevar E.E.G. na altura di entrada diun akomodashon turístiko. Kuater mucha hòmber a roba un dama i un hòmber di un tas. E malechornan, ku tabatin tapaboka bistí, tabata kore riba baiskel i a hui bai den direkshon di Playa ku e botin. Ta investigando e kaso.

Detenshonnan

Den oranan di anochi riba djabièrnè 30 di aprel, a hasi tres detenshon. Alrededor di 9.50 or di anochi

a detené un hòmber di inisial R.P.S. di 36 aña en konekshon ku maltrato di doño di un snek situá na Kaya Korona. Alrededor i 10 or di anochi a detené un hòmber di inisial F.D.d.P. di 52 aña di edat en konekshon ku violensia doméstiko. Ta investigando e kasonan.

A topa kurpa sin bida den kura

Riba djaweps 29 di aprel sentral di polis a risibí notifikashon ku tabatin un hòmber ku no tabata duna señal di bida den un kura di un kas benta abou. Despues di investigashon di polis i dòkter a konkluí ku ta trata di un morto natural. Ta trata di e hòmber di inisial M.C.N. di 83 aña di edat.

A hòrta dos baiskel

Riba djaweps 29 aprel a drenta keho di ladronisia di dos baiskel. Ta trata di un baiskel shinishi di marka Giant , modèl Boulder i un baiskel blou skur i plata, di marka Trek. E baiskel nan tabata na lòk riba pòrch di un kas situá na Kaya Nikiboko Sùit. Deskonosínan a bai ku nan entre 12 or i 6 or di mardugá. E kaso ta bou di investigashon.

Aksidente entre tres outo

Alrededor di 8.45 or riba djaweps 29 di aprel un aksidente entre tres outo a tuma lugá riba Kaya Korona. Shofùr di un outo a pèrdè kontrol riba su stür i abai dal den un outo despues di kua ela bai dal den un otro outo.

Komportashon peligroso den tráfiko ta kondusí na detenshon

Den oranan di mèrdia riba djárason 28 di aprel a detené un hòmber di inisial R.D.N. di 20 aña  en konekshon ku entre otro resistensia kontra polis, pa no duna oido na òrdu di polis, pa okashoná peliger riba karetera, pa no duna señal di stòpòf direkshon, pa surpasá e límite di velosidat, pa kore sin hèlm, sin reibeweis i sin plachi di number.

Share This
error: Content is protected !!