Mi ta kontentu ku bo a drenta mi famia,” Mack Thode a bisa. Esei ta loke semper mi ta kòrda ku el a bisami, pasobra tabata den e promé lunanan ku mi a mi a kuminsá frei su prima Junella. Mi no tabata konosé Mack. Ku mi 22  aña mi a konosé Mack, miéntras nos a kuminsá tèst motosaikel na altura di e molina na entrada di Sorobon Beach bai pabou. E tabata un di e 5 pa 6 koredónan ku a kuminsá trein pusta riba kaya(1995-96). Un era nobo, pasobra promé ku esei tabatin mas hende tabata pusta riba kaya, sinembargo no a sigui i bai pusta riba un pista di drèk, loke Humprey Silberie, Ditmar de Palm, John Dekker, Lesley Francees†, Mack i ami a hasi. Esnan menshoná, ku eksepshon di Lesley†, a siña pusta riba kaya i despues pone nan práktika riba pista. Pa hasi e storia hopi kòrtiku, na novèmber 1996, despues ku mi a sali kampion na Kòrsou den dragrace ku mi motosaikel, esei a motivá 5 koredó di motosaikel pa bai pusta na Aruba. Entre nan Mack. Asina a kontinuá i Mack a bai Aruba i Kòrsou na diferente okashon pa pusta. Motosaikel ta su pashon. Mi kuné so a yega di bai pusta na Kòrsou. El a bisami nos ta hinka e motosaikelnan den un Bronco(djip grandi) ku e tabatin i asina nos motosaikelnan a bai Kòrsou ku e barku Don Andres. Mack a bai ku un Kawasaki 1100cc i ami ku ‘Big Daddy’. Mi a keda na di 3 lugá den e kareda. Aparte di esei, Mack, i diferente otro koredó di motosaikel di Boneiru a bai pusta na Kòrsou i Aruba. 
Mack a ofresémi na diferente okashon, momentu ku mi tabata sali kampion na Kòrsou i selebrá na Boneiru (dilanti NAPA AUTO PARTS), e tabata pèrkurá pa entre otro pastechi, kasbal ku mi por kòrda. Semper sin mi pidié e tabata hasié di su kurason p’ami. Nunka mas esaki por sali for di mi mente. 2001 mi a bira kolega ku Mack na ‘Radio Nederland Werlend Omroep’. Despues e kompania a sera na 2012. For di e tempu ei, debí ku mi a stòp di kompetí ku motosaikel na Kòrsou, Mack i ami su kontakto a bira ménos. El a sigui kompetí na Kòrsou i despues di 2 pa 3 aña e no a sigui. Mack semper a yamami Pipo. Su yunan a lanta tendé bisa Pipo, i nan ta yamami asina.   

Pustamentu di motosaikel na Sorobon a bira ménos,   esei ta pone ku masha poko nos tabata topa. Nos tabata App si debesenkuando. Despues el a operá pia i último bia ku mi a top’é, tabata na kunuku di mi sua Gernard Martines, 27 di febrüari. 

Mack un persona hopi alegre, chistoso i hasi wega. Asina e tabata. Loko riba motosaikel ku tabata su pashon! Gusta yuda tur hende. E ta bon konosí na Boneiru, Aruba i Kòrsou.  

El a bira malu drenta hospital. Mi a keda tende tokante su situashon di salú, te ku el a bai sosegá den reino di Dios. Nos tur a karga speransa ku e ta regresá kas. Tabata deseo fuerte di su famia pa mir’é na kas. Dios a skohe otro. Un hòmber ku semper mi a tende papia di yunan. Stima nan hopi i a hasi tur kos semper pa nan ta bon. Komèr Nunu i yunan, forsa. Mi palabranan ta simpel sinembargo Dios tin e konsuelo pa boso. Manera bo a bisami:”Un hende manera Mack, nunka mas lo mi haña.” Riba potrèt Mack riba 1 di e diferente motosaikel ku e tabatin i  e na New York i Pennsylvania.    
Skirbí pa: Fittipaldi Pietersz.

Share This
error: Content is protected !!