Mas di un aña despues ku Komishon supervishon protekshon di dato personal BES (CBP BES) a hasi un investigashon di riesgonan pa privasidat serka MCB na Boneiru, e instansia awor ta kumpli ku e norma di privasidat. MCB a base di e rekomendashonnan di CBP BES a hasi un enorme esfuerso pa inová i asina a minimalisá e riesgo ku ta prosesá datonan personal (digitalisá) ilegal.

Den kuadro di su tarea di supervishon CBP BES ta kontentu di por konkluí ku MCB na Boneiru awor ta kumpli ku e rekisitonan ku ta fihá pa prosesamentu di datonan personal na un instansia finansiero. Asina segun CBP BES a logra un logro importante. MCB Boneiru a atendé i introdusí e rekomendashonnan di forma dinámiko.

CPB BES ta felisitá MCB ku e forma serio i struktural ku nan a atendé ku e retonan riba tereno di privasidat. MCB Boneiru sistemátikamente a introdusí un gran kantidat di medidanan di protekshon di privasidat den su organisashon. Ku esei, awor MCB ta kumpli ku e standart legal ku ta konta pa esei.

Pa e klientenan di MCB lo ta visibel tambe ku MCB ta atendé kouteloso ku e prinsipionan di prosesamentu di datonan personal. MCB a primintí tambe ku lo trein su personal riba tereno di privasidat i evaluá nan aserkamentu sistemátiko mas frekuente, di manera ku esaki ta forma parti di un maneho di privasidat duradero.

E aña akí tambe CBP BES lo kontinuá ku kòntròlnan pa wak si organisashonnan ta kumpli ku e reglanan di e lei di privasidat. Si bo kier sa mas tokante esei, bo por konsultá e wèpsait di CBP BES: www.cbpbes.com. Tambe bo por tuma kontakto ku Roëlla Pourier di e sekretariado: info@cbpbes.com, telefòn +599 7159114. 

Share This
error: Content is protected !!