Ainda ta duna prosèsferbal regularmente pa manehá sin faha di seguridat bisti
Riba djamars 18 di mei a kontrolá 25 vehíkulo durante di un kontrol di tráfiko na Kaya Korona.
A duna 2 prosèsferbal di kua un tabata pa manehá sin reibeweis i e otro tabata pa manehá sin seguro bálido.
Durante di kòntròlnan di tráfiko rutinario na diferente sitio den e dianan tras di lomba, a duna mas i mas shofùr but pa kore sin plachi di number, sin faha di seguridat bisti i pa uzo di telefòn bou di stür. Partikularmente pa manehá sin faha di seguridat bisti mayoria biaha a duna but.
Bisti bo faha pa bo mes seguridat. Un faha di seguridat ta protehá okupante di un outo durante di un aksidente.
Dor di uza e faha e persona protehá ta keda sinta riba su stul, no tin e posibilidat pa dal su kabes den winshil i no ta keda bentá den e outo p’aki p’aya.
Dor di bisti bo faha di seguridat bo chèns di tin un aksidente mortal ta baha ku 30 pa 40%. Tambe patras den outo bo tin 20% ménos chèns di keda herida seriamente ora bo tin bo faha bistí.
KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu.
Tambe ta konsehá estriktamente pa kumpli ku e reglanan di Lei di Tráfiko.
Ku esaki bo tambe ta kontribuí na un tráfiko seif i sigur riba e isla.
E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.
A bai ku skuter for di kompleho di apartamentu
Entre 4.30 or di atardi i 7.30 or di anochi deskonosínan a bai ku un skuter for di un kompleho di apartamentu situá na Bulevar J.A. Abraham.
E skuter tabata stashoná na lòk ku un lòk di stür riba e sitio di stashoná di e kompleho di apartamentu.
Ta trata di un skuter kolo shinishi, di marka Kymco, modèl Agility, numerá MF-331.
Den e kompartimentu tabatin tambe un hèlm di marka Nolan i un lòk di kadena. Ta investigando e kaso.
Share This
error: Content is protected !!