Willemstad– E Mishon Permanente pa Union Afrikano huntu ku e Grupo di Embahadornan Afrikano na Brussel den koperashon ku e inisiativa di ‘Kuentanan Afrikano’ i e Diáspora ta organisá selebrashon di Dia di Afrika 2021 dia 25 di mei 2021.

Tópiko e aña aki ta Arte, Kultura i Herensia: ‘Palanka pa konstruí e Afrika ku nos ke’.

 

Durante di e dia aki lo lansa e inisiativa yamá ‘Kuentanan Afrikano’ (African Tales) organisá ku sosten di representantenan di komunidatnan lokal, den tur fase di bida, hóben i di   Diáspora.

Esaki ta un esfuerso guiá pa Diáspora pa hinka orguyo i sentido fuerte di identidat bou di desendientenan afrikanonan, promoviendo herensia kultural i historia afrikano.

Kuentanan afrikano, meskos ku di otro lugánan, ta bini di tradishon oral for di hopi tempu.  E kuentanan aki ta pa siña, pa pasa balornan kultural i pa mustra riba aspektonan di bida.

 

Islanan di Karibe ulandes, Kòrsou, Aruba, Bonaire, Sint Maarten, Sint Eustatius i Saba i Sürnam tambe ta representá riba e dia aki i ta partisipantenan aktivo den e proyekto di kuentanan afrikano.

 

E evento aki ta tuma lugá den e dékada aki, dediká na hendenan di desendensia afrikano (2015 – 2024) proklamá pa Nashonnan Uní ku komunidat internashonal rekonosiendo ku hendenan di desendensia afrikano ta representá un grupo distinguí kendenan su derechi humano mester ta promové i protehá.

Riba kontinente merikano tin sigur 200 mion hende di henter mundu ku por identifiká nan mes komo hende di desendensia afrikano.

Mion mas ta biba na otro parti di mundu, ke men pafó di kontinente afrikano.

 

Dia 25 di mei, 1963, 31 lider afrikano a bini huntu den un kumbre pa lanta Organisashon di Union Afrikano. Nan a kambia e nòmber di Dia di Libertat Afrikano den Dia di Liberashon Afrikano i a kambia e fecha pa rekord’é pa dia 25 di mei. Ta referí na lantamentu di Dia di Liberashon Afrikano komo ‘Dia di Afrika’.

 

Un i tur ta invitá pa partisipá na e evento di ‘Zoom’ riba dia di 25 di mei awor:

https://zoom.us/webinar/register/WN_vwp6ByX-T_GJARAPdoUxIw òf e ‘live streams’

  • https://www.facebook.com/AfricanUnionCommission/
  • https://www.youtube.com/user/AUCommission
  • https://twitter.com/_AfricanUnion
  • https://www.facebook.com/AfricanTalesinstitute

 

Pa mas informashon por komuniká ku Bwalya Mwali @ info@africantales.org i bishitá https://au.int/en/newsevents/20210525/2021-africa-day-celebration

Share This
error: Content is protected !!