KRALENDIJK – Resientemente direktiva di EZ Air a reakshoná riba e komunikado di prensa di Unkobon unda a keda publiká ku EZ Air no ta tene su mes na e obligashon hurídiko pa laga e pasahero hasi un eskoho entre plaka bèk òf un voucher na momentu ku un buelo keda anulá.
Señora Sueyenne Dammerman, vice presiddente di EZ-Air, ta lamentá ku Unkobon su publikashon ta trese e kompania den un lus negativo siendo ku segun señora Dammerman EZ Air ta un kompania responsabel i fleksibel komo ku nan ta ofresé e pasahero e posibilidat pa ehekutá e buelo na un otro okashon ora anulá un buelo.
EZ Air no ta menshoná sinembargo ku responsabel i flexibel no ta konta pa e pasaheronan ku un “non refundable” ticket, ku no kier aseptá e oferta pa un buelo na un otro okashon. E hendenan aki ta pèrdè nan plaka. Te na ora debolbé plaka di un “refundable ticket” ta redusí esaki ku un multa. Esaki ta insólito komo ku no ta kulpa di e pasahero ku e buelo a keda anulá.
Unkobon kier aklará ku promé ku a bai publisidat ku e problemátiko aki, nan a aserká EZ Air den kuater okashon mustrando e kompania riba e obligashon huridiko di EZ-Air pa paga e pasahero su plaka bèk na momentu ku un buelo keda anulá. EZ Air sinembargo a keda nenga redondamentu pa debolbé e pasahero su plaka 100% bèk.
Unkobon ta lamentá ku direktiva di EZ Air mes no a reakshoná for di prinsipio riba argumentonan di Unkobon. Lo tabata muchu mas korekto si direktiva di EZ Air a reakshoná riba kontenido di e e-mailnan di Unkobon p’asina kohuntamente solushoná e problema aki.
Unkobon ta hasi un yamada na tur esnan ku ta sinti nan mes viktima di e práktikanan aki di kompanianan aereo pa raportá esaki na Unkobon. www unkobon.org/vlucht geannuleerd/
Si no yega na un solushon ku e kompanianan aereo inbolbí en torno pagamentu di plaka bek pa buelonan anulá, Unkobon lo publiká den un próksimo relato di prensa eksperensha ku pasaheronan ta tin ku diferente kompanianan aereo.
Share This
error: Content is protected !!