KRALENDIJK – Na 1983, tempu ku a publiká e di dos edishon di ‘Birds of The Netherlands Antilles’(Paranan di Antia) di Dr. K.H. Voous, e kantidat di para registrá na Boneiru tabata na 181. For di e momentu ei, e sifra akí a krese gradualmente pa yega na 237. Esaki ta nifiká un promedio di tres para nobo registrá kada dos aña. Esaki a aselerá últimamente, ku konfirmashon di 15 para nobo, den solamente e último sinku añanan.
Den Dutch Caribbean Nature Alliance (DCNA) su boletin di notisia grátis BioNews den e edishonnan 11 (2017), 19 (2018) i 31 (2020)a saka informashon nobo di kada aña. Den e artíkulonan anterior mi a deskribí loke a registrá den e añanan 2016-2019. Entre 2016 ku 2019 Peter-Paul Schets a duna informashon anual pa e lista di registrashon na Boneiru, ku tabata inkluí un resúmen kòrtiku di kada espesie nobo. Na 2020 a bini dos para nobo riba e lista akí.
Veloz Ordinario “Commmon swift” (Apus apus)
Na mei 2020, e opservadónan di para lokal Sipke Stapert i Steve Schnoll a mira i a saka pòtrèt di veloz úniko. Ku yudansa di diferente eksperto, inkluso Peter-Paul Schets (eksperto komentarista di eBird-Bonaire) a identifiká e para akí komo un Veloz Ordinario (Common swift), ku ta konosí i plamá den Oropa, pero no konosí den Karibe. Tin solamente un otro opservashon registrá den nos área, un registrashon di Sürnam for di di 2012. No solamente pa Boneiru esaki tabata un espesie nobo, pero tambe pa e islanan ABC i Karibe.
Veloz ordinario ta brui kasi rònt Oropa i Asia. Nan ta un bishitante hopi konosí den siudatnan na Wèst di Oropa kaminda nan ta yega for di nan basenan pa pasa wenter na fin di aprel i nan ta bula bai medio zomer. E ta un buladó fuerte i ta konosí ku e ta pasa mayoria parti di su bida bulando.
Meuchi hala blanku/ “White winged tern” (Chlidonias leucopterus)
Steve tabata opservando para na e Instalashon di Purifikashon di Awa di Kloaka (LVV) djaluna mainta tempran riba 12 di yüni 2020 ora ku el a ripará un meuchi chikitu deskonosí tabata drif den laria riba e tanki prinsipal. E meuchi akí tabata pa gran parti pretu ku boka pretu, pia kòrá, gran parti di hala blanku i rabu blanku. Grásias na algun pòrtrèt tremendo, a identifiká e para akí komo un Meuchi hala blanku ku pluma den su estilo ku e ta drumi riba nèshi, esaki tabata un primisia di registrashon pa Boneiru i tambe pa tur e islanan ABC. E meuchi akí a keda un siman largu na e mesun sitio, dunando asina algun otro opservadó di para ku suerte, oportunidat di opservá e para elegante i delikado akí.
Meuchi hala blanku ta brui entre Oropa Sentral ku Ost Asia. Kada primavera por mira e meuchi aki na Hulanda na kantidat chikitu. E espesie akí ta pasa wenter mas tantu na Afrika i Sùitost Asia, Oustralia i te hasta leu aya na New Zealand. Meskos ku e Veloz ordinario e meuchi akí ta rekonosé komo un para bagamundu sin paradero fiho na Nort Amérika.
E espesie di meuchi akí ta representá e espesie di para number 237 pa Boneiru. Interesante ta, ku di e 15 espesienan nobo ku a haña pa Boneiru for di 2016 bin ariba, a haña shete di nan na e tereno di tanki di awa na LVV. Anto 3 di esakinan tabata registrashon nobo pa e islanan ABC. Grásias na e tankinan di awa dushi, e área akí ta parse di ta un sorto di magnet pa para skars.
Share This
error: Content is protected !!