Na momento ku mi a kuminsa skibi e artikulo aki mi a pensa masha bon kiko mi ke bisa paso nos ku nos gusta masakra I kome otro sin buska drechi kiko un hende ke men of kiko e persona por nifika pa su pais. Esaki ta nos berdadero karakter? Kontesta ta NO.

Ora nos para ketu I analysa sin niun klase di prerogatorio nos ta yega na un otro konklushon I konhuntamente na un pensamentu mas sano I habri nos kurason ku ayudo di senor nos Dios.

Pa kuminsa niun hende lo a kambia nos himno I punto lo no tin diskushon mas aki.

Pida historia di nos himno:

No lubida ku senor Rudy Bedacht a bai ku nos himno monofoon esta un solo stem so pues no koral ku ta hasie 4 stem ku ta drenta den otro bai kambie den eksterior. Aki si niun hende no a grita, hasi bochicha ora a kambie. Tambe e no a kambia nada na e letranan ku tur respet. Tur loke ela hasi ku ayudo di e skol of konservatorio ku e la bai ku e himno ta hasie 4 stem. Esaki tambe a kosta hopi plaka pa hasi.CCB I Gobiernu di Boneiru a paga.

 

Vishon di hopi musiko:

Loke e vishon di hopi musiko ku a toka nashonal I internashonal ta: pensa kon pa engrandese e himno di nos isla den un forma orkestral nada mas. Un orkesta ta konsisti di 70 pa 100 hende.

Awor Kiko e effekto internashonal ta di un himno orkestral? Esaki ta hasi e himno zona mas grandi I hala atenshon mas pisa pa su kalidad I pueblo pa via di medio orkestral. Palabra ta keda meskos pues nada no ta kambia aki. Pues na palabra: Maske kon chikitu ku su defekto…..etc no mester wordu kambia paso ta realidad. Niun isla, pais of kontinente ta perfecto. Solamente Dios ta Perfekto.(Amen) Pa loke ta trata e himno mes bo ta hana dos vershon di e mesun himno. Unu kanta pa evento di gobiernu I paisnan ku ta plechtig of di karakter serio I un vershon instrumental ku ta un vershon di mitar di e himno orkestral toka pa evenemento di deporte, kultura I otro evenementonan ku ta toka solamente 1 strof di un himno paso si toke full ta tuma muchu hopi tempu. Tur kaminda na mundu ta hasi esaki no kere ku nos lo ta un eksepshon ora di un evenemento asina. Tin sentenares di aktividadnan Deportivo ku ta hasi esaki. Nos himno di patria materna hulanda no ta un eksepshon aki tambe pa sierto evenemento ta toka un strof so I instrumental. Merka, Russia I otro paisnan grandi tambe ta hasi esaki. Dikon nos mester sona chikitu anto?? Akaso nos no ke pa nos himno brilla na evenementonan grandi I mundial of evenementonan Deportivo?

 

44 mil dolar no ta nada pa loke nos ta hana bek.

Pa loke ta trata e sen ami no tin nada di aber ku e projekto aki pa klaridad di loke mi ta skibi.

Pa loke ta trata e prijs tin 70 of mas hende professional ta toka den un orkesta grandi, studio di grabashon professional ku por karga un orkesta grandi, konduktor di orkesta pa saka un produkto di alta kalidad I digno di representa nos pueblo tur esaki ta kosta sen. Korda tambe e grupo di kor Boneriano ku tin ku bai graba e bosnan ora e orkesta kaba hasi su trabou. Pues logiko ku ta kosta sen. I pa esnan ku a kore grita skibi bira emoshonal etc. para ketu un ratu I visualisa un himno boneriano toka den tur su gloria ku un orkesta grandi ta algu grandi I sensashonal. No ta algu pa hasi bo bira mas emoshonal ainda I sinti e grandes di nos himno? Ami sigur I mi ta sigura bo ku bo tambe lo ta. Pues kiko nos tin di perde? Nos ta permiti si ku ta gasta 44.000 dolar na tur sorto di kosnan ku por a bai otro mane: mandatarionan ku ta bai hulanda, kaminda ku ta mal kalkula, Deroche di plaka pa konsultantenan ku no ta nesesario I asina mi por menshona basta kos mas.  Un suidadano konosi pa Boneriano.

Share This
error: Content is protected !!