Promé ku tur kos Bonaire a bira kampeon U-14. Pabien
Despues di a publiká ku ta bai renobá himno di Bonaire diputado ta sali purá purá deklará ku e kos aki mester tabata un sorpresa pa pueblo. Diputado lo hasi bon diwak den su grupo di konsehero tantu interno komo eksterno unda e lèk ta. E persona ku a lèk sea e no ta pará tras di e proyekto òf no a risibí un rekompensá mirando e suma kuantioso. Reakshon di diputado den konferensia di prensa a mustra defisiensia di esun(nan) ku mester a konseh’é . Spich di diputado no tabatin un struktura pa splika e desishon. Diputado a traha riba sentimentu di pueblo usando e ekspreshon “stima Bonaire”. Tur boneriano stima Bonaire i su himno. Tras di diputado mester tabata pará su lider polítiko i no e kantantenan. A skohe e personanan, no pasobra nan stima Bonaire, mas bien a base di nan talento i nan stèm pa kanta i no pa defendé un desishon polítiko. Desishon di un diputado ta desishon polítiko i e mester tin konsehero ku ta dominá e lenguahe polítiko. Ta un persona ku ta presentá i defendé e maneho i tene e diputado for di kandela.Bonaire ta un isla goberná pa polítikonan a base di reglanan di bon gobernashon. Preguntanan ta: Mester aktualisá e himno i tabatin urgensia pa esaki, di unda i di ken e idea a sali, e idea aki ta reflehá e supsidio pa kultura, a hasi investigashon pa sa ku pueblo ke pa aktualisá e himno, ken òf ta Skal òf ta finansa òf ta miembro di despacho di diputado a konsehá pa duna lus bèrdè na e persona konserní pa hasi e trabou, un dokumental ta nesesario i kua grupo a haña e enkargo, kuantu persona a bai Merka pa hasi grabashon, a tene kuenta ku den pasado tabatin mas idea di mas músiko, a pensa riba otro músiko i gruponan kultural? Diputado a peka kontra reglanan di bon gobernashon danki na su konseheronan ku ta sali liber. No tabatin transparensia, ki tabata e motibu pa a traha kuchikuchi. A apliká arbitrariedat, dunando privilegio na un grupo. Prinsipio di ta hustu a keda poné un banda. Ta hustu pa parti bou di algun hende 44 mil dòler?Mi konseho na diputado: Atmití e fayo kontra reglanan di bon gobernashon i tuma un desishon fuerte. Deshasí di konseheronan tantu interno komo eksterno, ku tin wowo riba sèn i ku a hinka abo den e posishon aki . Disidí ku ta warda e himno den archivo pa sèmper i laga tur ku a traha òf koperá keda ku e sèn. Na e himno renobá òf re kreá òf aktualisá ta keda un oló desagradabel. Kada biaha ku e zona lo sinti e oló ei.

Share This
error: Content is protected !!